जागतिक बँकेने जीडीपी दराचा अंदाज घटवला

आर्थिक वर्ष 26 मध्ये जीडीपी दर 6.3 टक्क्यांनी वाढणार

वृत्तसंस्था/ नवी दिल्ली 

आयएमएफनंतर आता जागतिक बँकेनेही 2025-26 या आर्थिक वर्षात भारतीय अर्थव्यवस्थेचा विकास दर कमी केला आहे. जागतिक बँकेच्या मते, आर्थिक वर्ष 26 मध्ये जीडीपी 6.3 टक्के दराने वाढेल. यापूर्वी ऑक्टोबर 2024 मध्ये विकास दर 6.7 टक्के राहण्याचा अंदाज वर्तवण्यात आला होता. जागतिक बँकेने म्हटले आहे की निर्यातीवरील व्यापार धोरणांमध्ये बदल जागतिक विकासावर दबाव आणत आहेत. जागतिक आर्थिक कमकुवतपणा आणि धोरणात्मक अनिश्चितता खासगी गुंतवणुकीवर चलनविषयक धोरणाचा सकारात्मक परिणाम कमी करेल.

22 एप्रिल रोजी आयएमएफनेही विकास दर कमी केला.  आंतरराष्ट्रीय नाणेनिधीने म्हणजेच आयएमएफने भारताच्या सकल देशांतर्गत उत्पादनाचा म्हणजेच जीडीपी वाढीचा अंदाज कमी केला. आयएमएफच्या मते, 2025-26 या आर्थिक वर्षात भारताची अर्थव्यवस्था 6.2 दराने वाढेल. यापूर्वी, आयएमएफने आर्थिक वर्ष 26 मध्ये विकास दर 6.5 टक्के राहण्याचा अंदाज वर्तवला होता.

 मूडीज फर्मने म्हटले आहे की

हिरे, कापड आणि वैद्यकीय उपकरणांवरील टॅरिफ निर्यातीला धोका निर्माण करत आहेत. यामुळे अमेरिकेसोबतची व्यापार तूट वाढू शकते. 90 दिवसांच्या टॅरिफवरील बंदीपासून काही प्रमाणात दिलासा मिळू शकतो, असे फर्मने म्हटले आहे, परंतु एकदा टॅरिफ पूर्णपणे लागू झाल्यानंतर, निर्यात मागणी कमी होईल आणि व्यवसायाचा विश्वास कमी होईल, असे म्हटले जात आहे. तिसऱ्या तिमाहीत जीडीपी वाढ 6.2 टक्के होती. आर्थिक वर्ष 2024-25 च्या ऑक्टोबर-डिसेंबर तिमाहीत जीडीपी वाढ 6.2 टक्के होती.

आरबीआय काय म्हणाले

भारतीय रिझर्व्ह बँक म्हणजेच आरबीआयने 9 एप्रिल रोजी झालेल्या पतधोरण बैठकीत आर्थिक वर्ष 26 साठीचा आर्थिक विकास दर 6.7 टक्के वरून 6.5टक्के पर्यंत कमी केला. 16 एप्रिल रोजी, मूडीज रेटिंग्जने आपला विकास दर कमी केला होता. मूडीजने 2025 मध्ये अर्थव्यवस्था 5.5-6.5 टक्केच्या दरम्यान वाढण्याचा अंदाज वर्तवला आहे, जो पूर्वी 6.6 टक्के होता. ट्रम्पच्या नवीन टॅरिफ धोरणामुळे फर्मने अपेक्षा कमी केल्या होत्या.