बोलेरोची धडक बसून सोनट्टीची महिला ठार

काकतीत महामार्गावर घडला अपघात

बेळगाव : भरधाव बोलेरोची धडक बसून सोनट्टी, ता. बेळगाव येथील एका वृद्धेचा मृत्यू झाला. रविवार दि. 19 नोव्हेंबर रोजी सकाळी काकतीजवळ हा अपघात घडला. बोलेरो चालकाविरुद्ध काकती पोलीस स्थानकात एफआयआर दाखल करण्यात आला आहे. सिद्धव्वा यल्लाप्पा बरनट्टी (वय 77) रा. लक्ष्मी गल्ली, सोनट्टी असे त्या वृद्धेचे नाव आहे. सिद्धव्वा रविवारच्या बाजारासाठी वंटमुरीला जात होती. काकतीजवळ बसच्या प्रतीक्षेत महामार्गाशेजारी ती उभी होती. त्यावेळी बेळगावहून कोल्हापूरकडे जाणाऱ्या बोलेरोची धडक बसून ती गंभीर जखमी झाली. तिला 108 रुग्णवाहिकेतून सिव्हिल हॉस्पिटलला हलविण्याआधीच तिचा मृत्यू झाला. सिद्धव्वाच्या पश्चात एक मुलगा, पाच मुली, नातवंडे असा परिवार आहे. मुलगा हणमंत बरनट्टी याने दिलेल्या फिर्यादीवरून बोलेरोचालक संभाजी आनंदा पाटील (वय 51) रा. साके, ता. कागल, जि. कोल्हापूर याच्यावर एफआयआर दाखल करण्यात आला असून पोलीस निरीक्षक विजयकुमार शिन्नूर पुढील तपास करीत आहेत.