विंडीज महिलांचा भारतावर एकतर्फी विजय

सामनावीर कर्णधार मॅथ्यूजचे नाबाद दमदार अर्धशतक, मालिकेत विंडीजची बरोबरी

वृत्तसंस्था / नवी मुंबई

तीन सामन्यांच्या टी-20 मालिकेतील येथील डी.वाय. पाटील स्टेडीयमवर मंगळवारी खेळविण्यात आलेल्या दुसऱ्या सामन्यात कर्णधार मॅथ्यूजच्या नाबाद अर्धशतकाच्या जोरावर विंडीजने यजमान भारतीय महिला क्रिकेट संघाचा 9 गड्यांनी दणदणीत पराभव करुन मालिकेत बरोबरी साधली. भारताने विजयासाठी 160 धावांचे आव्हान दिले. भारताने प्रथम फलंदाजी करताना 20 षटकात 9 बाद 159 धावा जमविल्या. कौरच्या गैरहजेरीत नेतृत्व करणाऱ्या स्मृती मानधनाने अर्धशतक झळकविले. त्यानंतर विंडीजने 15.4 षटकात 1 बाद 160 धावा जमविल्या.

विंडीजच्या डावाला कर्णधार मॅथ्यूज आणि जोसेफ यांनी दमदार सुरुवात करुन देताना 40 चेंडूत 66 धावांची भागिदारी केली. ठाकुरने जोसेफला घोषकरवी झेलबाद केले. जोसेफने 22 चेंडूत 2 षटकार आणि 6 चौकारांसह 38 धावा जमविल्या. मॅथ्यूज आणि कॅम्पबेल या अनुभवी जोडीने भारतीय गोलदांजी झोडपून काढली. या जोडीने दुसऱ्या गड्यासाठी 54 चेंडूत अभेद्य 94 धावांची भागिदारी करत विजयाचे सोपस्कार पूर्ण केले. मॅथ्यूजने 47 चेंडूत 17 चौकारांसह नाबाद 85 तर कॅम्पबेलने 26 चेंडूत 4 चौकारांसह नाबाद 39 धावा जमविल्या. विंडीजच्या डावात 2 षटकार आणि 27 चौकार नोंदविले गेले. भारतातर्फे ठाकुरने 28 धावांत 1 गडी बाद केला. विंडीजने पॉवरप्लेच्या 6 षटकात 65 धावा जमविल्या. विंडीजचे अर्धशतक 26 चेंडूत, शतक 63 चेंडूत आणि दीडशतक 88 चेंडूत नोंदविले. मॅथ्यूजने 31 चेंडूत 11 चौकारांसह अर्धशतक पूर्ण केले. 10 षटकाअखेर विंडीजची स्थिती 1 बाद 94 अशी होती.

या सामन्यात विंडीजने नाणेफेक जिंकून भारताला प्रथम फलंदाजी दिली. भारताच्या डावामध्ये सलामीच्या स्मृती मानधनाने 41 चेंडूत 1 षटकार आणि 9 चौकारांसह 62 झोडपल्या. या मालिकेतील पहिल्या सामन्यातही मानधनाची फलंदाज बहरली होती. रॉड्रिग्सने 15 चेंडूत 2 चौकारांसह 13, दीप्ती शर्माने 15 चेंडूत 2 चौकारांसह 17 आणि रिचा घोषने 17 चेंडूत 6 चौकारांसह 32 धावा जमविल्या. स्मृती मानधना आणि दीप्ती शर्मा यांनी चौथ्या गड्यासाठी 56 धावांची भागिदारी केली. भारताच्या डावामध्ये 1 षटकार आणि 21 चौकार नोंदविले गेले. भारताने पॉवरप्लेच्या 6 षटकात 35 धावा जमविताना 2 गडी गमविले. भारताचे अर्धशतक 51 चेंडूत तर शतक 82 चेंडूत आणि दीडशतक 115 चेंडूत नोंदविले गेले. मानधनाने आपले अर्धशतक 37 चेंडूत 8 चौकारांच्या मदतीने झळकविले. विंडीजतर्फे हेन्री, डॉटीन, मॅथ्यूज आणि फ्लेचर यांनी प्रत्येकी 2 गडी बाद केले.

संक्षिप्त धावफलक: भारत 20 षटकात 9 बाद 159 (स्मृती मानधना 62, रॉड्रिग्स 13, दीप्ती शर्मा 17, रिचा घोष 32, अवांतर 7, हेन्री, डॉटीन, मॅथ्यूज आणि फ्लेचर प्रत्येकी 2 बळी), विंडीज 15.4 षटकात 1 बाद 160 (मॅथ्यूज नाबाद 85, जोसेफ 38, कॅम्पबेल नाबाद 29, अवांतर 8, ठाकुर 1-28)