प. बंगालच्या राज्यपालांनी राजभवनाचे केले ‘लोकभवन’

वृत्तसंस्था/ कोलकाता

पश्चिम बंगालचे राज्यपाल सी. व्ही. आनंद बोस यांनी शनिवारी एक मोठा निर्णय घेत कोलकाता येथील राजभवनाचे नाव लोकभवन असे ठेवले. केंद्र सरकारच्या मंजुरीनंतर हा निर्णय अधिकृतपणे लागू झाला आहे. राज्यपाल बोस यांनी केंद्र सरकारच्या पत्राचा संदर्भ देत यासंबंधी अधिकृतपणे घोषणा केली. ‘गृह मंत्रालय, भारत सरकारच्या 25.11.2025 च्या मेमोरँडम क्रमांक 7/10/2025 (भाग)-एम अँड जी नुसार, कोलकाता, फ्लॅगस्टाफ हाऊस आणि दार्जिलिंग येथील ‘राजभवन’च्या इमारतींची नावे ‘लोकभवन’ अशी सुधारण्यात आली आहेत. ही अधिसूचना तात्काळ लागू होत आहे.’ असे त्यांनी स्पष्ट केले. राज्याच्या मुख्यमंत्री ममता बॅनर्जी यांनी याबाबत अद्याप कोणतेही भाष्य केलेले नाही.