कणबर्गीतील ‘तो’ धोकादायक ट्रान्स्फॉर्मर इतरत्र हलवण्याची ग्रामस्थांची मागणी

बेळगाव : कणबर्गी येथील धर्मवीर संभाजी मूर्तीशेजारील बसस्टँड रोड परिसरात धोकादायक ट्रान्स्फॉर्मर आहे. यामुळे परिसरातील नागरिकांना धोका निर्माण होत असून हा धोकादायक ट्रान्स्फॉर्मर बदलावा, अशी मागणी कणबर्गी ग्रामस्थांच्यावतीने सोमवारी हेस्कॉमकडे निवेदनाद्वारे करण्यात आली. धर्मवीर संभाजी महाराजांच्या मूर्तीशेजारीच एक जुना ट्रान्स्फॉर्मर आहे. कोणतेही सण-उत्सव साजरे करताना या धोकादायक ट्रान्स्फॉर्मरमुळे अडचणी येत आहेत. त्यामुळे हा ट्रान्स्फॉर्मर इतरत्र बदलल्यास सर्वांचीच सोय होणार आहे. त्यासाठी तो ट्रान्स्फॉर्मर बदलावा अशी मागणी हेस्कॉमचे साहाय्यक कार्यकारी अभियंता ए. एम. शिंदे यांच्याकडे निवेदनाद्वारे करण्यात आली.

ट्रान्स्फॉर्मर बदलण्याचे आश्वासन

निवेदन स्वीकारून शिंदे यांनी लवकरच ट्रान्स्फॉर्मर बदलला जाईल, असे आश्वासन दिले. यावेळी माजी महापौर शिवाजी सुंठकर, माजी नगरसेवक संजय सुंठकर, सिद्धेश्वर देवस्थान कमिटी, धर्मवीर संभाजी चौक तसेच ग्रामस्थ मोठ्या संख्येने उपस्थित होते.