वनश्री क्रिकेट क्लब-के. आर. शेट्टी आज अंतिम लढत

सिगन चषक टी-20 क्रिकेट स्पर्धा

बेळगाव : सिगन स्पोर्ट्स क्लब आयोजित सिगन चषक टी-20 क्रिकेट स्पर्धेच्या उपांत्यफेरीच्या सामन्यातून वनश्री क्रिकेट क्लबने ब्ल्यूस्टार संघाचा 4 गड्यांनी तर के. आर. शेट्टीने गोकाक क्रिकेट क्लबचा 9 धावांनी पराभव करुन अंतिम फेरीत धडक मारली आहे. सुनील सक्री व विनायक यांना सामनावीर पुरस्कार देण्यात आला. पहिल्या उपांत्य फेरीच्या सामन्यात ब्ल्यूस्टार संघाने प्रथम फलंदाजी करताना 19.4 षटकात सर्वगडी बाद 106 धावा केल्या. त्यात आनंद जाधवने 8 चौकारासह 53 धावा करुन अर्धशतक झळकविले. त्याला नवीनने 24 धावा करुन सुरेख साथ दिली. वनश्रीतर्फे बसवराज एम.ने 19-3, लक्ष्मण देवरने 20-3, जाफर सादीक एम.ने 17-2 तर लक्ष्मीकांतने 1 गडी बाद केला. प्रत्युत्तरादाखल खेळताना वनश्री क्रिकेट क्लबने 19.2 षटकात 6 गडी बाद 109 धावा करुन सामना 4 गड्यांनी जिकंला. विनायकने 2 षटकार,4  चौकारासह 57, जाफर सादीक एम.ने 1 षटकार 1 चौकारासह 22 धावा केल्या. ब्ल्युस्टारतर्फे अजयने 16 धावांत 2 तर अभी भोगण व भरत मुतगेकर यांनी प्रत्येकी 1 गडी बाद केला.

दुसऱ्या उपांत्यफेरीच्या सामन्यात के. आर. शेट्टीने प्रथम फलंदाजी करताना 20 षटकात 8 गडी बाद 148 धावा केल्या. त्यात प्रणय शेट्टीने 2 षटकार 4 चौकारासह 21 चेंडूत 36, संतोष सुळगे पाटीलने 2 षटकार 2 चौकारासह 33, स्वयंम खोतने 4 चौकारासह 31, राहुल शिंदेने 17 धावा केल्या. गोकाकतर्फे पुरूषोत्तम जक्कबाळने 41-2, आनंद के.ने 19-2, अनिल नाईकने 20-2 तर अश्विन सुणगारने 1 गडी बाद केले. प्रत्युत्तरादाखल खेळताना गोकाक क्रिकेट क्लबचा डाव 19.2 षटकात 139 धावांत आटोपला. त्यात मोहम्मद मुजेफाने 3 चौकारासह 29, युसुफ वंटमुरीने 2 चौकारासह 26, पुरुषोत्तमने 2 षटकारासह 17, वासीम मारिहाळने 15 तर चेतन व आनंद यांनी प्रत्येकी 12 धावा केल्या. के. आर. शेट्टीतर्फे सुनील सक्रीने 24-3, संतोष सुळगे पाटीलने 21-2, अनंत माळवीने 32-2 तर रबानी दफेदार, मिलिंद बेळगावकर यांनी प्रत्येकी 1 गडी बाद केला.