200 वस्तूंवरील टॅरिफ अमेरिकेने हटवले

ट्रम्प यांच्या घोषणेने भारतालाही दिलासा

वृत्तसंस्था/ वॉशिंग्टन

अमेरिकेचे राष्ट्राध्यक्ष डोनाल्ड ट्रम्प यांनी फळे, मांस आणि कॉफीसह 200 वस्तूंवरील टॅरिफ हटवण्याची घोषणा केली आहे. या निर्णयाचा फायदा भारत आणि ऑस्ट्रेलियासह अनेक देशांना होईल. महागाई नियंत्रित करण्यासाठी आणि ग्राहकांना दिलासा देण्यासाठी हा निर्णय घेण्यात आला. अमेरिकेने आता दीर्घकाळ चालणाऱ्या टॅरिफ युद्धात अडकलेल्या देशांना दिलासा देण्यास सुरुवात केली आहे.

अमेरिकेने आयात कर कमी करण्यासाठी इक्वेडोर, ग्वाटेमाला, एल साल्वाडोर आणि अर्जेंटिना यांच्याशी करार केल्यानंतर लगेचच शुल्क कमी करण्याचा हा निर्णय घेतला आहे. महागाई नियंत्रित करण्यासाठी आणि सर्वसामान्यांना दिलासा देण्यासाठी ट्रम्प यांचा हा निर्णय महत्त्वपूर्ण मानला जात आहे. ट्रम्प यांनी भारताकडून होणाऱ्या आयातीवर 25 टक्के परस्पर शुल्क लादले होते. शिवाय, रशियाकडून भारताने तेल खरेदी केल्यामुळे संतप्त झालेल्या अमेरिकेच्या राष्ट्राध्यक्षांनी भारतावर अतिरिक्त 25 टक्के दंडात्मक शुल्क लादले होते. ट्रम्प यांनी 200 वस्तूंवरील शुल्क वाढवण्याच्या निर्णयापूर्वी, त्यांनी जेनेरिक औषधांवरील शुल्क हटवले होते. या निर्णयामुळे भारताला मोठा फायदा झाला. अमेरिकेत निर्धारित जेनेरिक औषधांपैकी 47 टक्के भारत पुरवतो.

ऑस्ट्रेलियन परराष्ट्रमंत्री पेनी वोंग यांनी अमेरिकेच्या निर्णयाचे स्वागत केले आहे. 200 हून अधिक अन्न उत्पादनांवरील अमेरिकेचे शुल्क हटवल्याने ऑस्ट्रेलियन निर्यातदार आणि वाढत्या किराणा किमतींचा सामना करणाऱ्या अमेरिकन ग्राहकांना फायदा होईल, असे ते म्हणाले. शुल्क हटवल्याने खुल्या बाजारपेठेचे महत्त्व दिसून येते. या निर्णयामुळे दोन्ही बाजूंच्या ग्राहकांना आणि उत्पादकांना फायदा होईल.