यु मुम्बाचा बेंगळूरवर थरारक विजय

वृत्तसंस्था / नोएडा

2024 च्या प्रो कबड्डी लीग स्पर्धेतील येथे खेळविण्यात आलेल्या चुरशीच्या सामन्यात यु मुम्बा संघाने बेंगळूर बुल्सवर 34-32 अशा केवळ दोन गुणांच्या फरकाने थरारक विजय मिळविला.

या सामन्यात मनजित आणि अजित चौहान यांनी यु मुम्बा संघातर्फे एकूण 15 गुण नोंदविले. या सामन्यातील विजयामुळे यु मुम्बा संघाने गुणतालिकेत दुसऱ्या स्थानावर झेप घेतली आहे. या सामन्यात यु मुम्बाचा कर्णधार सुनीलकुमारने नवा इतिहास घडविला. प्रो कब•ाr लीग स्पर्धेच्या इतिहासामध्ये कर्णधार सुनीलकुमारच्या नेतृत्वाखाली यु मुम्बाने विक्रमी 73 सामन्यात विजय मिळविला आहे.

बेंगळूर बुल्सबरोबरच्या सामन्यात पहिल्या 4 मिनिटांमध्ये मनजित आणि अजित चौहान यांनी आपल्या चढायांवर यु मुम्बाला गुण मिळवून दिले. बेंगळूर बुल्सचा संघ पहिल्या 10 मिनिटांमध्ये 4 गुणांनी पिछाडीवर होता. प्रदीप नरवालचे मैदानात आगमन झाल्यानंतर बेंगळूर बुल्सचा संघ अधिकच भक्कम वाटू लागला. दोन्ही संघांनी दर्जेदार चढाया केल्या. अजित चौहानने आपल्या चढाईंवर यु मुम्बाला 2 गुण मिळवून दिली. तसेच यावेळी बेंगळूर बुल्सचे सर्वगडी बाद झाले. यु मुम्बाने मध्यंतरावेळी बेंगळूर बुल्सवर 18-10 अशा 8 गुणांची आघाडी मिळविली होती. मात्र सामन्याच्या उत्तराधार्थ बेंगळूर बुल्सचा खेळ अधिक आक्रम आणि वेगवान झाल्याने शेवटच्या 5 मिनिटांमध्ये दोन्ही संघ बरोबरीत राहिले होते. त्यानंतर यु मुम्बाने एका गुणाची आघाडी मिळविली. शेवटच्या चढाईवर यु मुम्बाने आणखीन एक गुण मिळवून बेंगळूर बुल्सचा 34-32 अशा दोन गुणांच्या फरकाने पराभव केला.