अट्टल दुचाकी चोराला अटक

सव्वालाखाच्या पाच दुचाकी जप्त

बेळगाव : एका अट्टल दुचाकी चोराला अटक करून सव्वालाख रुपये किमतीच्या पाच दुचाकी जप्त करण्यात आल्या आहेत. टिळकवाडी पोलिसांनी ही कारवाई केली आहे. बेळगाव शहर व उपनगरात त्याने चोरीची कबुली दिली आहे. गणेश शिवप्पा कोळवी (मूळचा रा. सुणकुंपी, ता. बैलहोंगल, सध्या रा. भाग्यनगर आठवा क्रॉस) असे त्याचे नाव आहे. पोलीस आयुक्त यडा मार्टिन मार्बन्यांग यांच्या मार्गदर्शनाखाली पोलीस निरीक्षक परशुराम पुजेरी, उपनिरीक्षक संतोष दळवाई, साहाय्यक पोलीस उपनिरीक्षक एन. के. बडिगेर, महेश पाटील, एस. एम. करलिंगण्णवर, लाडजीसाब मुल्तानी, नागेंद्र तळवार, उमेश मुदवी आदींचा समावेश असलेल्या पथकाने ही कारवाई केली आहे. टिळकवाडी पोलीस स्थानकाच्या कार्यक्षेत्रात झालेल्या दुचाकी चोरीचा तपास करताना संशयावरून गणेशला अटक करण्यात आली. त्याची कसून चौकशी केली असता टिळकवाडीसह शहरातील वेगवेगळ्या भागात पाच दुचाकी चोरल्याची कबुली त्याने दिली.