दोन दहशतवाद्यांना पूंछमधून अटक

ग्रेनेडसह 1 पिस्तूलही जप्त

वृत्तसंस्था/ श्रीनगर

जम्मू-काश्मीरमधील पूंछमध्ये शनिवारी सकाळी सुरक्षा दलांनी 2 दहशतवाद्यांना अटक केली. त्यांच्याकडून 3 ग्रेनेड आणि 1 पिस्तूलही जप्त करण्यात आले आहे. हे दोघेही जम्मू-काश्मीर गजनवी फोर्स नावाच्या संघटनेशी संबंधित दहशतवादी असल्याचे लष्कराच्या अधिकाऱ्यांनी सांगितले. अशाप्रकारचे हायब्रिड दहशतवादी सामान्य नागरिकांप्रमाणेच परिसरात राहतात, परंतु गुप्त कारवायांमध्ये स्वत:ला गुंतवून दहशतवाद्यांना मदत करतात.

अटक करण्यात आलेल्या दहशतवाद्यांनी चौकशीदरम्यान काही कारनाम्यांमध्ये सहभागी असल्याची कबुली दिली आहे. दोन्ही दहशतवादी मंदिर, लष्करी तळ आणि हॉस्पिटलवर ग्रेनेड फेकण्याचा कट रचत होते. लोकांमध्ये भीती निर्माण करण्यासाठी त्यांनी पूंछमध्ये देशविरोधी पोस्टरही चिकटवले. हे दहशतवादी सीमेपलीकडे पाकिस्तानात बसलेल्या दहशतवाद्यांच्या संपर्कात असल्याचेही स्पष्ट झाल्याचे जम्मू पोलिसांचे एडीजीपी आनंद जैन यांनी सांगितले.