शाहिद कपूरसोबत झळकणार तृप्ति

विशाल भारद्वाज यांच्या नव्या चित्रपटाची घोषणा

‘तेरी बातों मे ऐसा उलझा जिया’ या चित्रपटाच्या यशानंतर शाहिद कपूरचा आगामी चित्रपट ‘देवा’ची चाहते आतुरतेने प्रतीक्षा करत आहेत. याचदरम्यान शाहिदच्या आणखी एका चित्रपटाची घोषणा झाली आहे. शाहिदच्या चाहत्यांना या चित्रपटात एक नवी जोडी पाहता येणार आहे. शाहिदने 21 वर्षांच्या कारकीर्दीत अनेक दिग्गज अभिनेत्रींसोबत काम केले आहे. आता शाहिद हा तृप्ति डिमरीसोबत दिसून येणार आहे. तृप्ति आणि शाहिद या नव्या जोडीच्या चित्रपटाचे दिग्दर्शन विशाल भारद्वाज करणार आहे. शाहिद आणि विशाल भारद्वाज यांनी यापूर्वी देखील एकत्र काम केले आहे. साजिद नाडियावालाने या चित्रपटाची घोषणा केली आहे. या चित्रपटाच्या घोषणेनंतर तृप्ति डिमरीने आनंद व्यक्त केला आहे. साजिद नाडियावाला ग्रँड सन या बॅनर अंतर्गत निर्माण होणाऱ्या या चित्रपटाचे नाव अद्याप घोषित करण्यात आलेले नाही. शाहिद सध्या ‘देवा’ या चित्रपटाचे चित्रिकरण करत आहे. तर तृप्ति अलिकडेच प्रदर्शित विक्की विद्या का वो वाला वीडियो या चित्रपटात दिसून आली आहे. या चित्रपटातील तिच्या अभिनयाचे कौतुक देखील होत आहे.