बसमध्ये गळफास घेऊन परिवहन कर्मचाऱ्याची आत्महत्या

मध्यवर्ती बसस्थानक आवारातील डेपोमध्ये घटना

प्रतिनिधी/ बेळगाव

परिवहन मंडळाच्या एका मेकॅनिकने डेपोमध्ये थांबलेल्या बसमध्ये गळफास घेऊन आत्महत्या केल्याची घटना शनिवारी सकाळी उघडकीस आली. मध्यवर्ती बसस्थानकाच्या आवारात असलेल्या पहिल्या डेपोमध्ये ही घटना घडली असून आत्महत्येचे निश्चित कारण समजू शकले नाही. केशव तिप्पाण्णा कमडोळ्ळी (वय 57 रा. दीपक गल्ली, जुने गांधीनगर) असे त्या दुर्दैवी कर्मचाऱ्याचे नाव आहे. शुक्रवारी मध्यरात्रीनंतर पहिल्या डेपोच्या आवारात उभ्या करण्यात आलेल्या बेळगाव-अळणावर बसमध्ये त्याने गळफास घेऊन आपले जीवन संपविले आहे. शनिवारी पहाटे ही घटना उघडकीस आली. घटनेची माहिती समजताच मार्केटचे पोलीस उपनिरीक्षक विठ्ठल हावण्णावर व त्यांच्या सहकाऱ्यांनी घटनास्थळी भेट देऊन पंचनामा केला. यासंबंधी केशवची पत्नी गुरव्वा कमडोळ्ळी (वय 42) यांनी दिलेल्या फिर्यादीवरून एफआयआर दाखल करण्यात आला आहे.

कुटुंबीयांनी दिलेल्या माहितीनुसार केशव हे गेल्या 33 वर्षांपासून परिवहन मंडळाच्या पहिल्या डेपोमध्ये काम करीत होते. ते पाटदुखीच्या आजाराने त्रस्त होते. त्यांच्यावर उपचार करण्यात येत होते. त्यामुळे मेकॅनिकल कामाला कंटाळले होते. यापूर्वीही त्यांनी दोनवेळा आत्महत्येचा प्रयत्न केला होता. शुक्रवारी रात्री 9.30 वाजण्याच्या सुमारास जेवणासाठी ते घरी आले होते.

जेवणानंतर पुन्हा ते कामावर गेले होते.

केए 22 एफ 2233 क्रमांकाच्या बसमध्ये गळफास घेऊन या कर्मचाऱ्याने आत्महत्या केल्याचे उघडकीस आले आहे. घटनास्थळी कुटुंबीयांनी वरिष्ठ अधिकाऱ्यांवर आरोप केला असून आजारी असूनही त्यांचे काम बदलून देण्यात आले नाही. त्यामुळे झालेल्या मनस्तापातून कर्मचाऱ्याने आत्महत्या केली आहे. मार्केट पोलीस पुढील तपास करीत आहेत.