आज सातुळी देवी सातेरी देवस्थानचा जत्रोत्सव
हरिनाम सप्ताह सोमवार १५ डिसेंबर रोजी
ओटवणे । प्रतिनिधी
सातुळी गावचे ग्रामदैवत श्री देवी सातेरी देवस्थानचा वार्षिक जत्रोत्सव गुरुवारी ११ डिसेंबर रोजी तर हरिनाम सप्ताह सोमवार १५ डिसेंबर रोजी होत आहे.नवसाला पावणारी आणि माहेरवाशिणीची पाठीराखी अशी सातेरीची ख्याती असल्याने या जत्रोत्सवासाठी भाविकांची अलोट गर्दी होते. यानिमित्त मंदिरात सकाळी धार्मिक कार्यक्रम आटोपल्यानंतर सातेरी देवीला भरजरी वस्त्र व सुवर्ण अलंकारांसह आकर्षक फुलांनी सजवीण्यात आले. त्यानंतर देवस्थानच्यामानकऱ्यांच्या उपस्थितीत देवीची मानाची ओटी भरल्यानंतर देवीच्या दर्शनासाठी रात्री उशिरापर्यंत भाविकांची गर्दी होणार आहे. यानिमित्त रात्री सवाद्य पालखी मिरवणूकीनंतर उशिरा जय खानोलकर दशावतार कंपनीचे नाटक होणार आहे. तसेच सातेरी मंदिरात सोमवारी १५ डिसेंबर रोजी हरिनाम सप्ताह होणार असून सात प्रहराच्या या हरिनाम सप्ताहाची सांगता दुसऱ्या दिवशी मंगळवारी दुपारी महाप्रसादाने होणार आहे. यानिमित्त सातुळी परिसरातील भजनी मंडळे आपले सेवा सातेरी चरणी अर्पण करतात. भाविकांनी कार्यक्रमाचा लाभ घ्यावा असे आवाहन देवस्थानचे मानकरी तसेच सातुळी ग्रामस्थांनी केले आहे.