‘महारानी’चा चौथा सीझन येणार

हुमा कुरैशी पुन्हा मुख्य भूमिकेत

अभिनेत्री हुमा कुरैशीची ‘मिथ्या’ सीरिज अलिकडेच प्रदर्शित झाली आहे. या सीरिजमधील तिच्या अभिनयाचे कौतुक होत आहे. हुमाने आता महारानी या सीरिजच्या चौथ्या सीझनविषयी माहिती दिली आहे. महारानी या सीरिजचे तीन सीझन यापूर्वी सादर झाले असून त्यांना प्रेक्षकांकडून चांगला प्रतिसादही मिळाला आहे.

महारानी या सीरिजमध्ये हुमाने रानी भारती ही व्यक्तिरेखा साकारली होती. ही एक निरक्षर महिला असून ती स्वत:चा पती जखमी झाल्यावर बिहारची मुख्यमंत्री होत असल्याचे दर्शविण्यात आले होते. प्रेक्षकांनी या सीरिजमधील हुमाच्या अभिनयाला मोठी पसंती दिली होती.

ओटीटी एक बटनाच्या टॅपवर मनोरंजन उपलब्ध करते आणि ही एक मोठी शक्ती आहे,  याचबरोबर विषय प्रभावीपणे मांडण्यासाठी हे सक्षम व्यासपीठ आहे. महारानी या सीरिजमुळे लोकांनी माझ्या क्षमतेवर लक्ष दिले. याच्या  यशामुळे लोकांना माझ्या भूमिकांबद्दल विचार करण्यास भाग पाडले. माझ्या ओटीटीवरील यशामुळे निर्मात्यांनी माझ्यावर अधिक विश्वास दाखविला असल्याचे हुमाने म्हटले आहे. हुमा आगामी काळात जॉली एलएलबी 3 तसेच टॉक्सिक या चित्रपटात दिसून येणार आहे.