अॅशेस मालिकेतील पहिली कसोटी आजपासून

विजयाचा दुष्काळ संपवण्यास इंग्लंड उत्सुक

वृत्तसंस्था/पर्थ

इंग्लंड आणि ऑस्ट्रेलिया यांच्यातील अॅशेस मालिका आज शुक्रवारपासून सुरू होत असून या मालिकेचे वेध लागण्यास जुलै, 2023 च्या अखेरीसच प्रारंभ झाला होता. बेन स्टोक्स आणि त्याच्या इंग्लंड संघाने दक्षिण लंडनमधील ओव्हल येथील कसोटी जिंकली होती. मात्र त्यांना अॅशेस मालिकेचे जेतेपद मिळवता आले नव्हते. कारण पहिल्या दोन कसोटी जिंकणाऱ्या आणि पाच सामन्यांच्या मालिकेतील चौथा सामना अनिर्णित राखलेल्या ऑस्ट्रेलियन संघाला मुकुट राखून ठेवण्यात यश मिळाले होते.

या पार्श्वभूमीवर पर्थ स्टेडियमकडे लक्ष वेधले गेले आहे. सात आठवडे चालणार असलेल्या आणि पाच शहरांमध्ये होणार असलेल्या या मालिकेतील पहिल्या सामन्याच्या पहिल्या दिवशी काही मोठे प्रश्न निर्माण झाले आहेत. वाढत्या वयाच्या खेळाडूंनी भरलेला आणि ताकद कमी झालेला ऑस्ट्रेलिया 2010-11 च्या मालिकेपासून मायदेशी अॅशेसमध्ये अपराजित राहण्याची मालिका कायम ठेवू शकेल का, हा यातील मुख्य प्रश्न आहे. स्टोक्स इंग्लंडला त्या दीर्घ दुष्काळाचा अंत करण्यास प्रेरणा देऊ शकेल का, जगातील अव्वल कसोटी फलंदाज ज्यो रूट अखेर ऑस्ट्रेलियामध्ये अॅशेस शतक झळकावू शकेल का, स्टोक्स आणि रूट पहिल्यांदाच ऑस्ट्रेलियन भूमीवर कसोटी जिंकू शकतील का, असे अनेक प्रश्न उपस्थित झाले आहेत. ऑस्ट्रेलियन कर्णधार पॅट कमिन्स आणि सहकारी वेगवान गोलंदाज जोश हेझलवूड दुखापतींमुळे पहिल्या कसोटीला मुकतील.

यामुळे ऑस्ट्रेलियाच्या आक्रमक माऱ्यामध्ये त्यांच्या आघाडीच्या गोलंदाजांचा समावेश नसेल. असे असले, तरी डावखुरा वेगवान गोलंदाज मिशेल स्टार्क आणि ऑफस्पिनर नॅथन लायन यांना विश्वास आहे की, पर्थमधील वेगवान, उसळत्या खेळपट्टीवर संघ जिंकू शकेल. ब्रेंडन डॉगेट हा सहकारी वेगवान गोलंदाज स्कॉट बोलंडसह कसोटी पदार्पण करणार आहे, ज्यामुळे ऑस्ट्रेलियन पुऊषांच्या कसोटी संघात स्थानिक वारसा असलेले दोन खेळाडू पहिल्यांदाच दिसतील. कॅमेरॉन ग्रीन गोलंदाजीसाठी तंदुऊस्त झालेला असल्यामुळे तो अष्टपैलू खेळाडूची जागा भरेल आणि ऑस्ट्रेलिया सलामीवीर जॅक वेदरल्डला वयाच्या 31 व्या वर्षी कसोटी पदार्पणाची संधी देऊ शकते. त्यामुळे मार्नस लाबुशेन तिसऱ्या क्रमांकावर परतू शकेल, तर चौथ्या क्रमांकावर हंगामी कर्णधार स्टीव्ह स्मिथ असेल.

स्टोक्सला ऑस्ट्रेलियातील इंग्लंडची कामगिरी चांगलीच माहित आहे. इंग्लंडला गेल्या 15 कसोटी सामन्यांमध्ये 13 पराभव सहन करावे लागले आहेत, दोन सामने अनिर्णित राहिले आहेत आणि एकही विजय मिळालेला नाही. तो 2010-11 च्या इंग्लिश संघाबद्दल अधिक विचार करत असेल, ज्याने ऑस्ट्रेलियाला 3-1 असे पराभूत केले होते. ‘ही मालिका किती मोठी आहे हे मला समजते. जे येथे आले आणि यशस्वी झाले अशा इंग्लंडच्या काही भाग्यवान कर्णधारांपैकी एक बनून मी जानेवारीमध्ये घरी परतण्यासाठी येथे आलो आहे. इतिहासाबद्दल आणि इंग्लंडसाठी तो कसा राहिला आहे याबद्दल बरेच काही बोलले गेले आहे. पण ही आपला स्वत:चा इतिहास घडवण्याची संधी आहे’, असे बेन स्टोक्सने म्हटले आहे.

विजयाच्या दुष्काळातून बाहेर पडण्यासाठी इंग्लंड वेगवान गोलंदाजांना अनुकूल परिस्थितीत वेगवान गोलंदाजांच्या जोड्या वापरण्याची शक्यता आहे. जोफ्रा आर्चर ऑस्ट्रेलियामध्ये चांगली कामगिरी करेल अशी अपेक्षा आहे आणि 35 वर्षीय मार्क वूड हा स्नायूंच्या दुखापतीतून बरा झाला आहे आणि पहिल्या कसोटीसाठी 12 जणांच्या संघात त्याचा समावेश करण्यात आला आहे. स्टोक्सही गोलंदाजी करेल आणि जरी फिरकी गोलंदाज शोएब बशीरला 12 जणांच्या संघात समाविष्ट करण्यात आले असले, तरी वेगवान गोलंदाज ब्रायडन कार्स आणि गस अॅटकिन्सन हे देखील खेळण्याची शक्यता आहे, 36 वर्षीय स्मिथ या वर्षी तिसऱ्यांदा आणि 2018 मधील सँडपेपरगेट घोटाळ्यामुळे कर्णधारपद गमावल्यानंतर सातव्यांदा ऑस्ट्रेलियाचे नेतृत्व करेल. मागच्या वेळी म्हणजे 2021-22 मध्ये इंग्लंडने ऑस्ट्रेलियाचा दौरा केला असता त्याने कर्णधारपदाची जबाबदारी सांभाळली होती.

►ऑस्ट्रेलिया : स्टीव्ह स्मिथ (कर्णधार), जॅक वेदरल्ड, उस्मान ख्वाजा, मार्नस लाबुशेन, ट्रॅव्हिस हेड, कॅमेरॉन ग्रीन, अॅलेक्स केरी, मिचेल स्टार्क, नॅथन लायन, ब्रेंडन डॉगेट, स्कॉट बोलँड.

►इंग्लंड : बेन स्टोक्स (कर्णधार), झॅक क्रॉली, बेन डकेट, ऑली पोप, ज्यो रूट, हॅरी ब्रूक, जेमी स्मिथ, ब्रायडन कार्स, गस अॅटकिन्सन, जोफ्रा आर्चर, मार्क वूड, शोएब बशीर.

प्रक्षेपण : जिओ हॉटस्टार, भारतीय वेळ : सकाळी 7.50 पासून