महिला-बालकल्याण खात्याची इमारत जीर्णावस्थेत
इमारतीत काम करणाऱ्या कर्मचाऱ्यांना धोका : शौचालय, पिण्याच्या पाण्याची व्यवस्था नसल्याने गैरसोय; प्रशासनाचे दुर्लक्ष
बेळगाव : शिवाजीनगर येथील महिला व बालकल्याण खात्याच्या कार्यालयाची इमारत जीर्ण झाली आहे. अशा अवस्थेतच कर्मचाऱ्यांना जीव मुठीत घेऊन काम करण्याची वेळ आली आहे. 100 वर्षे पूर्ण केलेल्या आणि दुर्लक्षित झालेल्या या इमारतीकडे प्रशासन लक्ष देणार का? असा प्रश्न उपस्थित होऊ लागला आहे. 100 वर्षे पूर्ण केलेल्या या इमारतीत महिला व बालकल्याण खात्याचा कारभार चालतो. मात्र इमारतीच्या दुरुस्तीकडे दुर्लक्ष झाल्याने दुर्दशा झाली आहे. खिडक्या आणि दरवाजे मोडकळीस आले आहेत. भिंतीनाही तडे गेले आहेत. शिवाय वरच्या छताची अवस्थाही गंभीर बनली आहे. अशा परिस्थितीत या इमारतीमध्ये कामकाज सुरू आहे. पूर्वी या इमारतीत मूकबधीर मुलांची शाळा भरायची. या शाळेचे स्थलांतर आझमनगर येथे करण्यात आल्यानंतर 1980 पासून महिला व बालकल्याण खाते याठिकाणी कार्यरत आहे.
वित्त विभागाकडून 4 कोटी रुपये मंजूर
महिला व बालकल्याण खात्याच्या नवीन इमारतीच्या बांधकामासाठी वित्त विभागाकडून 4 कोटी रुपये मंजूर झाले आहेत. मात्र अद्याप त्याची कोणतीच कार्यवाही झालेली नाही. लवकरच नवीन इमारतीला प्रारंभ होईल. सध्याच्या इमारतीत दुरुस्ती करण्यात आली आहे.
- नागराज आर. (महिला व बालकल्याण खाते, सहसंचालक)