दहशतवादी उमरच्या साथीदाराला अटक

श्रीनगरमध्ये कारवाई : दिल्ली स्फोटाशी संबंधित धागेदोरे सापडले

वृत्तसंस्था/ नवी दिल्ली

दिल्ली स्फोट प्रकरणात एनआयएने दहशतवादी उमरचा आणखी एक सहकारी जसीर बिलाल वाणी उर्फ दानिश याला जम्मू काश्मीरमधील श्रीनगर येथून अटक केली. जसीरने दहशतवादी उमरला तांत्रिक मदत पुरवण्यासह स्फोटांसाठी ड्रोनमध्ये बदल केले आणि रॉकेट बनवण्याचा प्रयत्नही केल्याचा दावा केला जात आहे. एनआयएच्या मते, जसीर हा दहशतवादी उमरचा एक प्रमुख सहकारी आहे. तो अनंतनागमधील काझीकुंडचा रहिवासी असून त्याने दिल्ली स्फोटात सक्रिय भूमिका बजावली होती. तो डॉ. उमरसह स्फोटाच्या नियोजनात सहभागी होता.

दिल्लीतून अटक केलेल्या अमीर रशीद अलीकडून महत्त्वाची माहिती प्राप्त झाली आहे. त्याने स्फोटापूर्वी उमरला सुरक्षित घर दिले होते आणि आयईडी तयार करण्यातही मदत केली होती. अमीरची कोठडी मिळविण्यासाठी एनआयएने सोमवारी विशेष एनआयए न्यायालयात हे युक्तिवाद सादर केले. रविवारी दिल्लीतून अटक केलेल्या अमीरला सोमवारी न्यायालयात हजर करण्यात आले. संपूर्ण सुनावणी इन-कॅमेरा झाली. याप्रसंगी फक्त या प्रकरणाशी संबंधित अधिकारी आणि वकील उपस्थित होते. एनआयएने वाढीव कोठडीची मागणी केली होती. दिल्ली बॉम्बस्फोटात वापरलेली कार आमिरच्या नावावर असल्याचेही यापूर्वीच आढळून आले आहे.

अल फलाह विद्यापीठ चर्चेत

अल फलाह विद्यापीठ सध्या 10 नोव्हेंबर रोजी दिल्लीच्या लाल किल्ल्याजवळ झालेल्या बॉम्बस्फोटाच्या तपासामुळे चर्चेत आहे. या स्फोटात 13 जणांचा मृत्यू झाला आणि अनेक जण जखमी झाले. मुख्य आरोपी डॉ. उमर उन नबी हा विद्यापीठाचा विद्यार्थी होता. उमर नबी याच्या मित्र परिवारावरही पोलिसांची करडी नजर असून त्यांचीही चौकशी केली जात आहे. अटकेच्या भीतीने उमरच्या काही सहकाऱ्यांनी विद्यापीठातून पलायन केल्याचे समजते.

दिल्ली पोलिसांकडून कुलगुरूंना नोटीस

दिल्ली पोलिसांनी कुलगुरू जवाद सिद्दीकी यांना दोनदा नोटीस बजावली आहे. या नोटीसीमध्ये काही विसंगती दूर करण्यासाठी त्यांच्या जबाबाची आवश्यकता असल्याचे नमूद केले आहे. संशयास्पद कारवायांमध्ये सहभागी असलेल्या विद्यापीठाशी संबंधित व्यक्ती आणि त्यांचे आर्थिक व्यवहार आणि रेकॉर्ड देखील पोलीस तपासत आहेत.

दिल्ली स्फोटात बूट बॉम्ब वापरल्याचा संशय

दिल्लीच्या लाल किल्ल्याजवळ झालेल्या दहशतवादी स्फोटात बूट बॉम्बचा वापर झाल्याचा संशय सुरक्षा यंत्रणांना आहे. सूत्रांनी दिलेल्या माहितीनुसार, स्फोट झालेल्या कारमधून तपास यंत्रणांना एक बूट जप्त करण्यात आला आहे. अमोनियम नायट्रेट आणि टीएटीपीचे ट्रेस सापडले आहेत. एजन्सी याला सुरुवातीचा संकेत मानत असल्याने या दृष्टिकोनातूनही तपास करत आहेत. टीएटीपी हा एक अत्यंत धोकादायक आणि संवेदनशील स्फोटक मानला जातो. अलिकडच्या काळात दहशतवादी अनेकदा याचा वापर करतात. त्याचा घर्षण किंवा अगदी थोड्या उष्णतेनेही स्फोट होऊ शकतो.