अनगोळ परिसरात मध्यरात्री संशयितांचा वावर

बेळगाव : अनगोळ परिसरात मध्यरात्री चोरट्यांचा वावर वाढला आहे. चार दिवसांपूर्वी मारुती गल्ली, अनगोळ येथे चोरीच्या उद्देशाने मध्यरात्रीनंतर फिरणाऱ्या आठ जणांची टोळी अनेकांच्या नजरेस पडली आहे. त्यामुळे परिसरात भीतीचे वातावरण पसरले आहे. मंगळवारी पहाटे तीन वाजण्याच्या सुमारास आठ जणांची ही टोळी मारुती गल्ली परिसरात फिरताना स्थानिक नागरिकांना दिसली. या टोळीतील गुन्हेगार चार जणांच्या गटात वावरत होते. एक गट बॅटरीच्या साहाय्याने बंद घरे पडताळण्यात मग्न होता. तर आणखी चार जणांचा एक गट परिसरात कोणी जागे आहे का? यावर लक्ष ठेवून होता. पहाटे 3 वाजण्याच्या सुमारास लघुशंकेसाठी उठलेल्या काही जणांनी या गुन्हेगारांना पाहिले. परिसरातील नागरिक जागे असल्याचे लक्षात येताच गुन्हेगारांनी तेथून पळ काढल्याचे समजते. दुसऱ्या दिवशी या घटनेची माहिती समजल्यानंतर नागरिकांमध्ये भीतीचे वातावरण पसरले आहे. परिसरात गस्त वाढविण्याची मागणी केली जात आहे.