किणये-पिरनवाडी परिसरात भटक्या कुत्र्यांचा हैदोस
सुमारे 50 ते 60 कुत्र्यांचा कळप : : बंदोबस्त करण्याची नागरिकांची मागणी
वार्ताहर/किणये
किणये ते पिरनवाडी परिसरात भटक्या कुत्र्यांनी हैदोस घातला आहे. गेल्या महिन्याभरापासून 50 ते 60 कुत्र्यांचा कळप वावरताना दिसत आहे. इतकी कुत्री या भागात आली कुठून असा सवाल नागरिक उपस्थित करू लागले आहेत. उचवडे क्रॉस या ठिकाणी सदर भटकी कुत्री कुणीतरी आणून सोडली असावी असा संशय किणये ग्रामस्थांनी व्यक्त केला आहे. रस्त्यावरून ये-जा करणाऱ्या नागरिकांवर ही कुत्री हल्ले करत आहेत. भुंकण्याच्या प्रकारांमध्ये वाढ झाली आहे. लहान बालके, महिलांवर भुंकून जात आहेत. यामुळे नागरिकांमध्ये भीतीचे वातावरण निर्माण झाले आहे. सदर भटक्या कुत्र्यांचा बंदोबस्त करावा अशी मागणी कण्यात येत आहे.
किणये गावच्या वेशीजवळ व शाळेजवळ सदर कुत्री बिनधास्तपणे फिरताना दिसत आहेत यामुळे नागरिक भयभीत झाले आहेत. मुख्य रस्त्यावर, गल्ल्यांमध्ये, बस थांब्याजवळ या भटक्या कुत्र्यांचा वावर वाढलेला आहे. पिरनवाडी सिद्धेश्वर गल्लीच्या कोपऱ्यावरील बस थांब्याजवळ, दर्ग्याजवळील बस थांब्याच्या शेजारी, उर्दू शाळेजवळ व मुख्य रस्त्यावर नेहमीच कुत्र्यांचे कळप थांबलेले असतात. याचा त्रास पादचारी, विद्यार्थी, महिलांना अधिक होत आहे अशी माहिती नागरिकांनी दिली. मच्छे औद्योगिक वसाहतीमधील कारखान्यांमध्ये जाणाऱ्या महिलांनाही कुत्र्यांच्या कळपामुळे नाहक त्रास होत आहे.
वाहनधारकांमध्ये भीतीचे वातावरण
यापूर्वी किणये भागात इतक्या प्रमाणात भटकी कुत्री कधीच दिसली नाहीत. या भटक्या कुत्र्यांमुळे सारे जणच भयभीत झाले आहेत. रस्त्यावरून ये-जा करणाऱ्या वाहनधारकांच्या जीवितासही धोका निर्माण झाला आहे. संबंधित खात्याच्या अधिकाऱ्यांनी या परिसराची पाहणी करून या भटक्या कुत्र्यांचा त्वरित बंदोबस्त करावा अशी मागणी करण्यात येऊ लागली आहे.
अनेक दुचाकीस्वार जखमी
पिरनवाडी ते किणये रस्त्यावर नेहमीच वाहनधारकांची मोठ्या प्रमाणात वर्दळ असते. दुचाकीस्वारांचाही सदर भटकी कुत्री पाठलाग करीत आहेत. त्यामुळे बरेच दुचाकीस्वार पडून जखमी झाले आहेत. अशा घटना वारंवार घडत आहेत अशी माहिती नागरिकांनी दिली.