लंकेचा भेदक मारा, लाहिरु कुमाराचे 2 बळी

पहिली कसोटी पहिला दिवस : द.आफ्रिका 4 बाद 80, पावसाच्या व्यत्ययाने 21 षटकांचा खेळ

वृत्तसंस्था/दरबान, द.आफ्रिका

यजमान द.आफ्रिका व लंका यांच्यात येथे सुरू झालेल्या पहिल्या कसोटीच्या पहिल्या दिवशी पावसाच्या व्यत्ययामुळे केवळ 21 षटकांचा खेळ होऊ शकला. या खेळात लंकेच्या भेदक गोलंदाजीपुढे यजमानांची स्थिती 20.4 षटकांत 4 बाद 80 अशी झाली होती. पावसाळी हवामान असल्यामुळे लंकेने नाणेफेक जिंकल्यानंतर द.आफ्रिकेला प्रथम फलंदाजी दिली आणि त्यांच्या गोलंदाजांनी हा निर्णय सार्थ ठरविताना चौथ्याच षटकात द.आफ्रिकेची स्थिती 2 बाद 14 अशी केली. असिता फर्नांडोने एडन मार्करमला (9) एका आऊटस्विंग कटरवर स्लिप क्षेत्रात मॅथ्यूजकरवी झेलबाद केल्यानंतर विश्वा फर्नांडोने टोनी डी झॉर्झीलाही (4) त्याच पद्धतीने बाद केले. लाहिरु कुमाराने वेग, लेंग्थमधील वैविध्यावर प्रथम ट्रिस्टन स्टब्सला 16 धावांवर करुणारत्नेकरवी झेलबाद केले व नंतर डेव्हिड बेडिंगहॅमला एका अप्रतिम चेंडूवर त्रिफळाचीत केले. डेव्हिडने 4 धावा केल्या.

किंग्समीडवर लंकेने याआधीच्या मागील दोन कसोटीत विजय मिळविला होता आणि या सामन्यातही त्यांचा त्याची पुनरावृत्ती करण्याचा मनोदय आहे. मात्र दुर्दैवाने पावसाचा अडथळा आल्याने केवळ 21 षटकांचाच खेळ होऊ शकला. कर्णधार टेम्बा बवुमा 28 धावांवर खेळत असला तरी त्यालाही लंकन गोलंदाजांसमोर झगडावे लागले. त्याला दोन जीवदानेही मिळाली. 47 चेंडूंच्या खेळीत त्याने 5 चौकार मारले आहेत. काईल व्हेरेन 9 धावांवर त्याला साथ देत आहे. मुसळधार पावसानंतर पंचांनी चहापानानंतरच्या सत्रात मैदानाची पाहणी केली आणि दिवसाचा खेळ रद्द केल्याची घोषणा केली.

संक्षिप्त धावफलक

दक्षिण आफ्रिका प.डाव 20.4 षटकांत 4 बाद 80 : मार्करम 9, डी झॉर्झी 4, स्टब्स 3 चौकारांसह 16, बवुमा खेळत आहे 47 चेंडूत 5 चौकारांसह 28, बेडिंगहॅम 4, व्हेरेन खेळत आहे 16 चेंडूत 9, अवांतर 10. लाहिरु कुमारा 2-35, असिता फर्नांडो 1-22, विश्वा फर्नांडो 1-17.