श्रेयसी जोशीने आशियाई रोलर स्केटिंग स्पर्धेत सुवर्णाची दुहेरी कमाई!

रत्नागिरी :

पुण्याची 21 वर्षीय रोलर स्केटर श्रेयसी जोशी हिने 20व्या आशियाई रोलर स्केटिंग चॅम्पियनशिप 2025 मध्ये ऐतिहासिक कामगिरी करत भारतासाठी दोन सुवर्णपदके पटकावली. 19 ते 30 जुलै 2025 दरम्यान दक्षिण कोरियातील जेचॉन येथे पार पडलेल्या या स्पर्धेत तिने इनलाइन फ्रीस्टाइल – क्लासिक स्लालम (वरिष्ठ महिला) आणि इनलाइन फ्रीस्टाइल – बॅटल स्लालम या दोन्ही प्रकारांमध्ये आपले वर्चस्व सिद्ध केले.

तिच्या या यशामुळे ती या स्पर्धेत सुवर्ण जिंकणारी पहिली भारतीय खेळाडू ठरली आहे. श्रेयसीचे आजोळ रत्नागिरी येथे असून, तिचा या ठिकाणाशी विशेष भावनिक ऋणानुबंध आहे.

• स्पर्धेतील चमकदार कामगिरी

क्लासिक स्लालम प्रकारात श्रेयसीने 83.33 गुण मिळवत आशियातील सर्वोत्तम खेळाडूंना मागे टाकले. तिच्या सादरीकरणात बॅकवर्ड क्रॉस-स्टेप्स, जलद फूटवर्क आणि निर्दोष स्पिन्स यांचा प्रभावी समावेश होता. बॅटल स्लालम प्रकारात तिने जपान, दक्षिण कोरिया आणि चायनीज ताइपे येथील खेळाडूंना पराभूत करत आपल्या चपळतेचा आणि सर्जनशीलतेचा उत्कृष्ट प्रत्यय दिला. रोलर स्केटिंग फेडरेशन ऑफ इंडिया (RSFI) ने तिच्या या यशाला भारतीय रोलर स्केटिंगमधील मैलाचा दगड असे गौरवले आहे.

• पार्श्वभूमी

श्रेयसी सध्या पुण्यातील MIT वर्ल्ड पीस युनिव्हर्सिटीमध्ये बी.टेक (कॉम्प्युटर सायन्स अँड इंजिनीअरिंग)च्या तृतीय वर्षात शिकत आहे. तिने केवळ तीन व्या वर्षी स्केटिंगला सुरुवात केली. तिची मोठी बहीण स्वराली जोशी हिच्यासोबत तिने राष्ट्रीय पातळीवर सातत्याने यश मिळवले आहे. श्रेयसीने 10 वेळा, तर स्वरालीने 8 वेळा राष्ट्रीय विजेतेपद पटकावले आहे. 2014 मध्ये, केवळ 12 वर्षांची असताना, तिने चीनमधील वर्ल्ड रोलर गेम्समध्ये भारताचे प्रतिनिधित्व केले होते. तिने चुंचॉन, मिलान, आणि सेनिगालिया येथील आंतरराष्ट्रीय स्पर्धांमध्येही पदके जिंकली आहेत. सध्या ती जागतिक क्रमवारीत तिसऱ्या स्थानावर आहे.

• कष्ट, समर्पण आणि प्रशिक्षण

श्रेयसीचे प्रशिक्षक अशुतोष जगताप म्हणाले, “श्रेयसी दररोज 6 ते 8 तास प्रॅक्टिस करते. तिची शिस्त, चिकाटी आणि समर्पण यामुळेच हे यश शक्य झाले.” श्रेयसी म्हणते, “फायनलमध्ये स्केटिंग करताना मला माझ्या मेहनतीचे फळ मिळाल्याचे जाणवले. माझे यश इतर तरुणांना प्रेरणा देईल अशी आशा आहे.”

• विपरीतावर मात 

श्रेयसीची आजी स्वाती गोखले यांनी सांगितले, “पहिल्या सादरीकरणादरम्यान ती 12-14 सेकंदांनंतर पडली, पण 2 सेकंदात उठून उर्वरित सादरीकरण पूर्ण केले. यामुळे गुणांवर काहीही परिणाम झाला नाही. तीच सर्वोत्तम ठरली.” ती पुढे म्हणाल्या, “हात मुरगळला होता. डॉक्टरांनी तत्काळ बॅंडेज व उपचार केले. तरीही तिने दुसऱ्या दिवशी सुवर्णपदक जिंकले. हे तिच्या मानसिक ताकदीचे उदाहरण आहे.”

• कुटुंबाचा ठाम पाठिंबा

श्रेयसी रत्नागिरीच्या आंबा बागायती क्षेत्रातील आजोळवासी आहे. तिचे आजोबा श्रीकांत गोखले, बँक ऑफ इंडियाचे निवृत्त क्षेत्रीय व्यवस्थापक, सध्या रत्नागिरीत कुटुंबासह स्थायिक आहेत. आई शिवानी जोशी, स्वेच्छानिवृत्त माध्यमिक शिक्षिका असून, वडील श्रीकंठ जोशी हे Persistent Systems मध्ये उपाध्यक्ष आहेत. दोघांनीही तिच्या सरावासाठी प्रत्येक शनिवार-रविवारी पाठिंबा दिला.

• जागतिक पातळीवरील तयारी

श्रेयसी आणि स्वराली आता 15 ते 20 ऑगस्ट 2025 दरम्यान चीनमधील चेंगदू येथे होणाऱ्या वर्ल्ड गेम्स 2025 साठी तयारी करत आहेत.
श्रेयसी म्हणते, “माझं स्वप्न जागतिक सुवर्णपदक जिंकण्याचं आहे.” ती सध्या स्पेनमधील आंतरराष्ट्रीय प्रशिक्षकांकडून नवीन तंत्र शिकत असून, जागतिक स्पर्धेतील बदलत्या प्रवाहांशी अद्ययावत राहण्यासाठी प्रयत्नशील आहे.

• पायाभूत सुविधांची आवश्यकता

“अशा खेळांसाठी पुण्यासारख्या शहरात वर्षभर सराव करता येईल अशा जागा उपलब्ध नाहीत. अशा सुविधा निर्माण झाल्यास अनेक नवीन खेळाडूंना संधी मिळू शकेल,” असे मत तिच्या कुटुंबीयांनी व्यक्त केले.