‘युरो टीम ऑफ दि टुर्नामेंट’मध्ये रोद्री, यामालसह स्पेनचे 6 खेळाडू

वृत्तसंस्था/ बर्लिन

स्पॅनिश मिडफिल्डर रोद्री आणि 17 वर्षीय लामिने यामाल यांना यूएफाच्या युरो 2024 स्पर्धेच्या संघात स्थान देण्यात आले असून या संघात त्यांच्या आणखी चार स्पॅनिश सहकाऱ्यांचा समावेश आहे. यूएफाच्या तांत्रिक निरीक्षकांनी 4-3-3 या रचनेचा अवलंब केलेला असून स्पर्धेदरम्यान हीच रचना सर्वाधिक लोकप्रिय राहिली.

इंग्लंडच्या कायल वॉकरला सलग दुसऱ्यांदा संघात स्थान मिळालेले असून या संघात निवड झालेला इंग्लिश संघातील तो एकमेव खेळाडू आहे. स्पेनने चौथ्यांदा युरो स्पर्धेचे जेतेपद मिळविताना अंतिम सामन्यात इंग्लंडवर 2-1 ने मात केली. या ‘टीम ऑफ दि टुर्नामेंट’मध्ये माईक मॅग्नन (फ्रान्स), मानुएल आकांजी (स्वित्झर्लंड), विल्यम सालिबा (फ्रान्स), मार्क कुकुरेला (स्पेन), डॅनियल ओल्मो (स्पेन), फाबियान रुईझ (स्पेन), जमाल मुसियाला (जर्मनी), निको विल्यम्स (स्पेन) या अन्य खेळाडूंचा समावेश करण्यात आलेला आहे.