शिवय्या पुजारी ‘किणये ग्रामीण केसरी’चा मानकरी

कामेश पाटीलचा प्रेक्षणीय विजय

वार्ताहर /किणये

बाल हनुमान कुस्तीगीर संघटना, किणये यांच्या वतीने खास श्री चौराशीदेवी यात्रेनिमित्त आयोजित भव्य कुस्ती मैदानात शिवय्या पुजारीने महाराष्ट्रच्या उदय खांडेकरचा 9 व्या मिनिटाला एकेरी हाताचा कस चढवून चितपट करीत किणये ग्रामीण आमदार केसरीचा मानकरी ठरला. महाराष्ट्र चॅम्पियन मामासाहेब मोहोळ तालीम पुणे येथील उदय खांडेकर विरुद्ध कर्नाटक केसरी मठपती आखाडा शिवय्या पुजारी यांच्यात प्रथम क्रमांकची कुस्ती युवा नेते मृणाल हेब्बाळकर, मारुती डुकरे, डॉ. कृष्णा पाटील, वीर पाटील, कल्लाप्पा नाईक, लक्ष्मण पाटील व  इतर मान्यवरांच्या हस्ते लावण्यात आली. दोन्ही पैलवानांनी एकमेकांच्या ताकदीचा अंदाज घेतला. प्रारंभी उदय खांडेकरने एकेरीपट काढून शिवय्या पुजारीवर ताबा मिळविला. त्यातून शिवय्याने सुटका करून घेतली. सातव्या मिनिटाला शिवय्याने पायाला आकडी लावून खाली घेत मानेचा कस काढण्याचा प्रयत्न केला. नवव्या मिनिटाला पुजारीने एकेरी पट काढून उदयवर ताबा मिळवत एकेरी हाताचा कस चढवून उदय खांडेकरला चितपट करून उपस्थित कुस्ती शौकिनांची मने जिंकली. पंच म्हणून महेश डुकरे यांनी काम पाहिले.

दुसऱ्या क्रमांकाची कुस्ती राष्ट्रीय चॅम्पियन कंग्राळीचा कामेश पाटील व पुणेचा बाला साळुंखे यांच्यातील कुस्ती ज्ञानेश्वर सोसायटीच्या संचालक मंडळाच्या वतीने लावण्यात आली. प्रारंभी कामेशने ताबा घेतला. यातून बाला साळुंखेने सुटका करून घेतली. चौथ्या मिनिटाला कामेशने बाला साळुंखेला घुटणा डावावर आसमान दाखविले. पंच म्हणून सुरेश डुकरे व नामदेव सांबरेकर यांनी काम पाहिले. तिसऱ्या क्रमांकाच्या कुस्तीमध्ये नॅशनल चॅम्पियन कंग्राळी खुर्द येथील प्रेम जाधवने पुण्याच्या नितीन साळुंखेला तिसऱ्या मिनिटाला गदेलोटवर चित करून विजय मिळवला. पृथ्वीराज हे जखमी झाल्यामुळे विनायक यांना विजयी घोषित करण्यात आले. आठव्या क्रमांकाच्या कुस्तीमध्ये श्रीकांत शिंदोळीने विजय मिळविला. नवव्या क्रमांकाच्या कुस्तीमध्ये तुकाराम किणयेने केशवला चितपट करून विजय मिळवला. अन्य कुस्त्यांत सिद्धार्थ तीर्थकुंडे, अथर्व पाटील,भूमिपुत्र मुतगा, महांतेश संतीबस्तवाड, पार्थ कंग्राळी, नचिकेत रणकुंडे, रोहन धामणे, प्रज्वल मच्छे,समर्थ लाटुकर अनगोळ, पार्थ तीर्थकुंडे, बाबू गुरव किणये, देवा येळ्ळूर, आरव पाटील यांनी आपल्या प्रतिस्पर्ध्यांवर विजय मिळविला.

महिला कुस्ती

आखाड्यात महिलांच्या  कुस्तीत  स्वाती पाटील कडोली, जानवी पाटील किणये व प्रांजल अनगोळ यांनी विजय मिळविला. मेंढ्याच्या कुस्तीत चुरशीची लढत समर्थ पाटील किणये व स्वयंम उचगाव यांच्यात लावण्यात आली. ही कुस्ती अतिशय रंगतदार अशी झाली. तिसाव्या fिमनिटाला ही कुस्ती बरोबरीत सोडविली. या कुस्तीसाठी पंच म्हणून राजू पाटील व संभाजी गुरव यांनी काम पाहिले. दुसऱ्या मेंढ्याच्या कुस्तीत विठ्ठल गुरव किणये व पृथ्वीराज अवचारहट्टी यांच्यात लावण्यात आली. चौथ्या मिनिटाला विठ्ठलने निकाल डावावर पृथ्वीराज याला चितपट करून मेंढ्याच्या कुस्तीचा मानकरी ठरला. पंच म्हणून पिराजी मुचंडीकर यांनी काम पाहिले.

आकर्षक कुस्तीमध्ये समर्थ डुकरे किणयेने आनंद निलजी याला चितपट करून विजय मिळविला. तसेच विठ्ठल गुरव यांचा प्रतिस्पर्धी श्रेयस हा उपस्थित नव्हता. यामुळे विठ्ठल याला विजयी घोषित करण्यात आले. लहान पैलवानांच्या कुस्तीमध्ये प्रतीक, प्रज्वल नाईक तुर्केवाडी, रवळनाथ तुर्केवाडी, अनिल निलजी, तन्मय कंग्राळी, शिवम मजगाव, प्रथम गणेशपूर आदींनी आपल्या प्रतिस्पर्ध्यांवर विजय मिळविला. प्रारंभी आखाड्याचे पूजन ज्ञानेश्वर सोसायटीचे संस्थापक चेअरमन व इतर सभासदांसह सुरेश डुकरे यांच्या हस्ते करण्यात आले. दीपप्रज्वलन ग्रामपंचायत सदस्य मारुती खोबाना डुकरे व श्रीधर गुरव आदींच्या हस्ते करण्यात आले. निवृत्ती डुकरे, लक्ष्मण बामणे, कृष्णा गुरव, विठ्ठल गोवेकर आदींच्या हस्ते विविध देवदेवतांचे फोटो पूजन करण्यात आले.

वैष्णव गुरव गदेचा मानकरी..

गदेच्या कुस्तीसाठी वैष्णव गुरव किणये व शिवानंद येळ्ळूर यांची कुस्ती अशोक डुकरे व इतर मान्यवरांच्या हस्ते  लावण्यात आली. तिसऱ्या मिनिटांवर वैष्णव गुरवने घिस्सा डावावर शिवानंदला चितपट करून गदेचा मानकरी ठरला. मान्यवरांच्या हस्ते गदा बक्षीस देऊन त्याला गौरवण्यात आले.