शिल्पा शेट्टीचा सोशल मीडियापासून ब्रेक

एकसारख्या गोष्टी पाहून आला वैताग

अभिनेत्री शिल्पा शेट्टीने गुरुवारी सोशल मीडियापासून ब्रेक घेण्याची घोषणा केली आहे. यासंबंधीची माहिती शिल्पाने एक पोस्ट शेअर करत दिली आहे. सोशल मीडियाचा आता वैताग आला आहे. नवे काही तर उपलब्ध झाले तरच सोशल मीडियावर परतणार असल्याचे शिल्पाने म्हटले आहे.

शिल्पा शेट्टीची सोशल मीडियावर मोठी फॅन फॉलोइंग आहे. ती सोशल मीडियावर स्वतःची आगामी चित्रपट, आरोग्य, फिटनेस आणि मोटिव्हेशनशी निगडित पोस्ट चाहत्यांसोबत शेअर करत होती. याचबरोबर स्वतःच्या कुटुंबासोबतची छायाचित्रे आणि चित्रफिती शेअर करायची. चाहते तिच्या प्रत्येक पोस्टवर प्रेमाचा वर्षाव करत होते. शिल्पाचे इन्स्टाग्रामवर 2.5 कोटींहून अधिक फॉलोअर्स आहेत. तर ट्विटरवर तिला 64 लाखांहून अधिक जण फॉलो करतात.

शिल्पा सध्या रोहित शेट्टीची आगामी वेबसीरिज ‘इंडियन पोलीस फोर्स’चे चित्रिकरण करत आहे. अलिकडेच तिचा या सीरिजमधील फर्स्ट लुक समोर आला होता. या शोद्वारे रोहित ओटीटी प्लॅटफॉर्मवर पदार्पण करणार आहे. या सीरिजमध्ये शिल्पासोबत सिद्धार्थ मल्होत्रा आणि विवेक ओबेरॉय देखील महत्त्वाच्या भूमिकेत दिसून येणार आहे.