शिवाजीनगरच्या तरुणावरील हल्लाप्रकरणी सात जणांना अटक; दोघे अद्यापही फरार

बेळगाव : क्षुल्लक कारणावरून शिवाजीनगर येथील एका तरुणावर खुनी हल्ला केल्याच्या आरोपावरून मार्केट पोलिसांनी सात जणांना अटक केली आहे. गुरुवारी दुपारी शिवाजीनगर येथील साई मंदिराजवळ ही घटना घडली होती. पोलीस आयुक्त भूषण गुलाबराव बोरसे यांनी ही माहिती दिली आहे. कुणाल राजेंद्र लोहार (वय 21) याच्यावर हल्ला करण्यात आला होता. या प्रकरणी मार्केट पोलीस स्थानकात नऊ जणांविरुद्ध एफआयआर दाखल करण्यात आला आहे. जखमी कुणालच्या आईने दिलेल्या फिर्यादीवरून पोलिसांनी एफआयआर दाखल करून खुनी हल्ला करणाऱ्या सात जणांना अटक केली आहे. लोखंडी रॉडने कुणालवर हल्ला करण्यात आला आहे. त्याच्यावर सिव्हिल हॉस्पिटलमधील अतिदक्षता विभागात उपचार करण्यात येत आहेत.

मार्केटचे पोलीस उपनिरीक्षक महांतेश धामण्णावर व त्यांच्या सहकाऱ्यांनी या घटनेनंतर काही तासातच हल्ला करणाऱ्यांच्या मुसक्या आवळल्या आहेत. सुदर्शन रामा पाटील (वय 19), भीमराय हालाप्पा गुंजगी (वय 22), दुर्गाप्पा सत्याप्पा पाटील (वय 21), सचिन भीमराय काटाबळी (वय 25), प्रकाश संभाजी लोहार (वय 25), श्रीधर रायाप्पा होंडाई (वय 31) सर्व राहणार भुतरामहट्टी, राकेश हुल्याप्पा बुडग (वय 26) राहणार मुत्यानट्टी अशी अटक करण्यात आलेल्या आरोपींची नावे आहेत. या प्रकरणातील आणखी दोघेजण फरारी असून पोलीस त्यांचा शोध घेत आहेत. अटक करण्यात आलेल्या सात जणांना न्यायालयासमोर हजर करण्यात आले आहे. न्यायालयाच्या आदेशावरून त्यांची रवानगी हिंडलगा येथील मध्यवर्ती कारागृहात करण्यात आली आहे. हल्ल्यासाठी वापरण्यात आलेले रॉड, केबल वायर व एक मोटारसायकल जप्त करण्यात आली आहे.