नदाफ-पिंजार समाजासाठी स्वतंत्र महामंडळ स्थापन करा

राज्य नदाफ संघाची सरकारकडे मागणी

बेळगाव : राज्यात 20 लाखांहून अधिक लोकसंख्या असलेला नदाफ समाज हा मागासलेला आहे. एकूण मुस्लीम लोकसंख्येच्या 25 ते 30 टक्के या समाजाची लोकसंख्या आहे. या समाजाला आजतागायत कुठे प्रतिनिधित्व मिळालेले नाही. त्यामुळे समाजाच्या विकासासाठी नदाफ-पिंजार विकास महामंळाची स्थापना करावी, अशी मागणी कर्नाटक राज्य नदाफ संघाच्यावतीने राज्य सरकारकडे करण्यात आली. नदाफ समाजामध्ये अशिक्षितांचे प्रमाण मोठे आहे. त्यामुळे त्यांना शिक्षित करण्यासाठी अभ्यास कक्षाच्या स्थापनेसाठी अनुदान मंजूर करावे. मागास म्हणून प्रमाणपत्रांचे वितरण करावे. आमदार, खासदार तसेच अधिकारीपदासाठी समाजाला प्रतिनिधित्व द्यावे, यासह इतर मागण्यांसाठी आंदोलन करण्यात आले.