सीमासत्याग्रही रामा शिंदोळकर यांचे निधन

बेळगाव : सीमासत्याग्रही व कोनवाळ गल्ली येथील पंच रामा हुवाप्पा शिंदोळकर (वय 86) यांचे वृद्धापकाळाने शुक्रवारी रात्री 9 वा. निधन झाले. सीमाप्रश्नासाठीच्या लढ्यात ते नेहमी स्वत:ला झोकून द्यायचे. प्रत्येक लढ्यात सहभागी व्हायचे. त्यांच्या पश्चात पत्नी, दोन कर्ते चिरंजीव, दोन कन्या, जावई, सून, नातवंडे असा परिवार आहे. शनिवार दि. 22 रोजी सकाळी 11 वाजता सदाशिवनगर स्मशानभूमी येथे त्यांच्यावर अंत्यसंस्कार करण्यात येणार आहेत. महाराष्ट्र एकीकरण समितीचे कट्टर कार्यकर्ते म्हणून ओळखले जाणारे रामा शिंदोळकर यांचा सीमाप्रश्नाच्या प्रत्येक लढ्यात सहभाग असायचा. काळ्यादिनाच्या फेरीत ते सायकलवरून सहभागी होत असत. गोवामुक्ती आंदोलनातही त्यांनी भाग घेतला होता. त्यांच्या निधनामुळे म. ए. समितीने एक ज्येष्ठ व सच्चा कार्यकर्ता गमावला आहे.