सांबरा, बाळेकुंद्री खुर्द परिसरात तुरळक प्रमाणात भात कापणीला प्रारंभ

सांबरा : सांबरा, बाळेकुंद्री खुर्द परिसरात पावसाने थोडीशी उघडीप दिल्याने तुरळक प्रमाणात भात कापणीला प्रारंभ करण्यात आला आहे. सध्या पूर्वभागामध्ये सर्वच भात कापणीला आले आहे. मात्र दररोज सकाळी ढगाळ वातावरण निर्माण होत असल्याने शेतकऱ्यांमध्ये भीतीचे वातावरण आहे. मात्र गेल्या दोन दिवसापासून सांबरा, मुतगा व बाळेकुंद्री खुर्द परिसरातील आगाऊ आलेल्या बासमती भात पिकाच्या कापणीला प्रारंभ करण्यात आला आहे. पुढील काही दिवसांमध्ये पावसाने पूर्णत: उघडीप दिल्यानंतर सुगी हंगामाला वेग येणार आहे. पूर्वभागातील बसवण कुडची, निलजी, मुतगा आदी भागातील शेतकरी सध्या उघडीपीच्या प्रतीक्षेत आहेत.