फुलबाग गल्ली, फोर्ट रोड येथील रस्त्यांची डागडुजी करा

आमदार सेठ यांची अधिकाऱ्यांना सूचना

बेळगाव : शहरातील ऑटोमोबाईल बाजारपेठेत असलेल्या फोर्ट रोड, फुलबाग गल्ली परिसरात रस्त्याची दुरवस्था झाली आहे. याचबरोबर जुना धारवाड रोड येथील छत्रपती शिवाजी महाराज उड्डाणपुलाच्या खालील सर्व्हिस रोडचीदेखील वाताहत झाली असल्याने या रोडची त्वरित डागडुजी करावी, अशी सूचना आमदार आसिफ ऊर्फ राजू सेठ यांनी महापालिका तसेच विविध विभागांच्या अधिकाऱ्यांना केली. मंगळवारी त्यांनी या परिसरात पाहणी करून रस्ते, गटारी, ड्रेनेज व्यवस्था यांची माहिती घेतली. रस्त्याच्या दुरवस्थेमुळे या परिसरात वारंवार वाहतूक कोंडी होत असून व्यवसायावर परिणाम होत असल्याची तक्रार स्थानिक दुकानदारांनी मांडली. पायाभूत सुविधांचा अभाव असल्याने फोर्ट रोड, फुलबाग गल्ली परिसरात सुविधा पुरविण्याच्या सूचना त्यांनी केल्या. तसेच लवकरात लवकर हे काम पूर्ण केले जाईल, असे आश्वासन दिले.

शाहूनगर येथे भेट 

आमदार सेठ यांनी शाहूनगर येथे श्रीराम कॉलनीला भेट देऊन येथील नागरिकांशी संवाद साधला. यावेळी नागरिकांनी परिसरात उद्भवलेल्या समस्यांची आमदारांना माहिती दिली. रस्ता तसेच गटारीचा प्रश्न लवकरच सोडविला जाईल, असे आश्वासन आमदारांनी दिले.