राष्ट्रीय स्वयंसेवक संघाचे दिमाखदार पथसंचलन
शिस्त, एकता व देशभक्तीचे दर्शन, शहरवासीयांकडून फुलांची उधळण
बेळगाव : जगातील सर्वात मोठी संघटना असलेल्या राष्ट्रीय स्वयंसेवक संघाच्या बेळगाव शाखेतर्फे रविवारी शहरात शानदार असे पथसंचलन करण्यात आले. शिस्त, एकता आणि देशभक्तीचे दर्शन शहरवासीयांना घडविण्यात आले. पथसंचलनाच्या स्वागतासाठी रांगोळ्या तसेच स्वागतकमानी उभारण्यात आल्या होत्या. फुलांची उधळण करत स्वयंसेवकांचे जल्लोषात स्वागत करण्यात आले. राष्ट्रीय स्वयंसेवक संघाचे यावर्षीचे शताब्दी वर्ष असल्याने मोठ्या संख्येने रविवारी झालेल्या पथसंचलनात स्वयंसेवक सहभागी झाले होते. सरदार्स हायस्कूल मैदानापासून पथसंचलनाला सुरुवात झाली. यावर्षी स्वयंसेवकांची संख्या मोठी असल्यामुळे दोन मार्ग तयार करण्यात आले होते. दोन्ही मार्ग टिळक चौक येथे एकत्रित येऊन पुढे भव्य पथसंचलन सादर करण्यात आले. पथसंचलनाच्या मध्यभागी भगवा ध्वज, भारतमाता, संस्थापक हेडगेवार व गोळवलकर गुरुजी यांच्या प्रतिमा असलेले वाहन होते.
शिस्तबद्धरीत्या ड्रम व तुतारीच्या ठेक्यावर पथसंचलन करण्यात आले. पहिल्या मार्गावरील पथसंचलन कॉलेज रोड मार्गे राणी चन्नम्मा चौक, जिल्हाधिकारी कार्यालय, चव्हाट गल्ली, भडकल गल्ली, खडक गल्ली, कचेरी रोड, शनिवार खूट, गणपत गल्ली, नरगुंदकर भावे चौक, शनिमंदिर मार्ग, कुलकर्णी गल्ली येथून टिळक चौक येथे पोहोचले. तर दुसऱ्या मार्गावरील पथसंचलन लिंगराज देसाई चौक, कंग्राळ गल्ली, काकतीवेस, स्वामी विवेकानंद मार्ग, गवळी गल्ली, गोंधळी गल्ली, स्वामी विवेकानंद चौक, समादेवी गल्ली, खडेबाजार, हंस टॉकीज रोड, कडोलकर गल्ली, हुतात्मा चौक, मारुती गल्ली, बसवाण गल्ली मार्गे टिळक चौक येथे पोहोचले. टिळक चौक येथे दोन्ही पथसंचलन एकत्र आल्यानंतर पुढे भव्य पथसंचलन झाले. रामलिंगखिंड गल्ली, धर्मवीर संभाजी चौक येथून लिंगराज कॉलेज मैदानावर पथसंचलनाची सांगता झाली. पारंपरिक पांढरा शर्ट, खाकी पँट, डोक्यावर काळी टोपी व हातामध्ये लाठी घेऊन हजारोंच्या संख्येने स्वयंसेवक सहभागी झाले होते.
फटाके वाजवण्यास पोलिसांचा मज्जाव
पथसंचलनाच्या स्वागतासाठी शहरातील नागरिक व व्यापाऱ्यांनी कमानी उभारल्या होत्या. गणपत गल्ली येथे पथसंचलनाच्या स्वागतासाठी फटाक्यांची आतषबाजी केली जाणार होती. परंतु पोलिसांनी आक्षेप घेत फटाके काढून घेतले. तसेच फटाके लावणाऱ्या तरुणालाही मारहाण केली. या घडलेल्या प्रकारामुळे नागरिकांनी संताप व्यक्त केला.