‘आझाद’मध्ये राशा थडानी

अजय देवगणच्या पुतण्यासोबत होणार पदार्पण

स्टार किड्सना लाँच करण्याचा चित्रपटसृष्टीतील प्रकार काही नवा नाही. दीर्घकाळापासून चित्रपट कलाकारांची मुले, भाऊ, पुतणे, भाचे चित्रपटसृष्टीत पाऊल ठेवत राहिले आहेत. आता या यादीत सुपरस्टार अजय देवगणचा पुतण्या अमन देवगण आणि रविना टंडनची मुलगी राशा थडानीचे नाव सामील होणार आहे.

या दोघांचेही पदार्पण ‘आझाद’ चित्रपटाद्वारे होणार आहे. या चित्रपटाचा फर्स्ट लुक पोस्टरही सादर करण्यात आला आहे. अजय देवगणने स्वत:च्या सोशल मीडिया अकौंटवरून याचे पोस्टर शेअर केले आहे. या पोस्टरमध्ये अमन हा घोड्यावर सवार दिसून येत आहे. ‘कहानी यारी की, कहानी वफादारी की, कहानी आझादी की’ असे याच्या कॅप्शनदाखल नमूद आहे.

आझाद या चित्रपटाचे दिग्दर्शन अभिषेक कपूरने केले आहे. यापूर्वी त्याने केदारनाथ, काइ पो चे आणि रॉ ऑन यासारख्या चित्रपटांचे दिग्दर्शन केले होते.  अजय देवगण देखील या चित्रपटात महत्त्वाची भूमिका साकारणार आहे. हा चित्रपट जानेवारी महिन्यात प्रदर्शित होणार आहे.