वाळपईसह केपेला पावसाने झोडपले
चोवीस तासात सहा इंच नोंद,राज्यात गतवर्षीच्या तुलनेत यंदा 40 इंच अतिरिक्त, पुढील दोन दिवस मुसळधार
पणजी : पावसाचे प्रमाण कमी होण्याची कोणतीही चिन्हे दिसत नाहीत. गत वर्षीच्या तुलनेत यंदा 1 हजार मि. मी. म्हणजेच 40 इंच अतिरिक्त पावसाची नोंद झाली. गेल्या 24 तासांमध्ये वाळपई व केपे भागात पावसाने झोडपून काढले. दोन्ही ठिकाणी प्रत्येकी 6 इंच पावसाची नोंद झाली. पुढील दोन दिवसांमध्ये मुसळधार पावसाचा इशारा हवामान खात्याने दिला आहे. पावसाचे प्रमाण थोडे कमी होतेय अशी स्थिती असताना बुधवारी गोव्यात सकाळच्या दरम्यान थोडी उसंत व थोडा सुटकेचा नि:श्वास सोडला, मात्र जनतेचा हा आनंद अल्पावधीतच गेला. जोरदार वादळीवाऱ्यासह पावसाने हजेरी लावली. त्यानंतर दुपारी थोडी विश्रांती घेतली व पुन्हा मुसळधार पाऊस पडला. सायंकाळी 6 वा. दरम्यान जोरदार वादळीवाऱ्यासह अनेक भागात मुसळधार पाऊस पडला. पाऊस थांबून थांबून पडतोय. परंतु नेहमीसारखा शांतपणे न पडता वादळीवाऱ्यासह तो कोसळतोय. त्यातून अनेक झाडांना धोका निर्माण झालेला आहे व या जोरदार वादळात अनेक झाडे जमीनदोस्त होत आहेत.
गेल्या 24 तासांमध्ये नोंदविलेला पाऊस पुढीलप्रमाणे
- केंद्र नोंदणी इंचामध्ये
- म्हापसा 1.50
- पेडणे 1.50
- फोंडा 1.00
- पणजी 1.50
- जुनेगोवे 1.50
- वाळपई 6.00
- सांखळी 3.50
- काणकोण 1.00
- दाबोळी 0.75
- मडगाव 3.25
- मुरगाव 1.25
- केपे 6.00
- सांगे 4.50
यंदाच्या मौसमात ज्या तीन केंद्रावर आतापर्यंत सर्वाधिक पावसाची नोंद झाली ती केंद्रे पुढीलप्रमाणे : मौसमात जेवढा पाऊस पडतो त्यापेक्षा जास्त पाऊस आताच झालेला आहे. अद्याप पावसाचे दोन महिने व मान्सूनोत्तर पावसाचा एक महिना मिळून पावसाचे तीन महिने जायचे आहेत. सर्वाधिक पाऊस हा वाळपईत 130 इंच, सांगे 125 इंच, सांखळी 121 इंच एवढी विक्रमी नोंद झालेली आहे. दरम्यान, आज व उद्या मुसळधार पाऊस पडेल असा इशारा देऊन हवामान खात्याने ऑरेंज अलर्ट जारी केला आहे.