राहूल चहरचे 51 धावांत 8 बळी

वृत्तसंस्था/ लंडन

इंग्लिश कौंटी क्रिकेट स्पर्धेत सरे संघात पदार्पणातील सामन्यात भारताचा फिरकी गोलंदाज राहुल चहरने हॅम्पशायर संघाचे 51 धावांत 8 गडी बाद केले. सरे संघातील गेल्या 166 वर्षांचा विक्रम चहरने मोडला आहे.

इंग्लिश कौंटी क्रिकेट स्पर्धेत चहरने सरे संघाबरोबर करार केला होता. या स्पर्धेतील पदार्पणातील सामन्यात राहुल चहरने भेदक गोलंदाजी केली. त्याने आपल्या 24 षटकात 51 धावांच्या मोबदल्यात 8 गडी बाद केले. चहरने या सामन्यात 118 धावांत 10 गडी बाद केल्याने सरेने हॅम्पशायरचा 20 धावांनी पराभव करत स्पर्धेच्या गुणतक्त्यात दुसरे स्थान मिळविले आहे. सरे संघाकडून 1889 मध्ये या स्पर्धेत विलियन मुडेलीने 61 धावांत 7 गडी बाद करण्याचा विक्रम राहुल चहरने मोडीत काढला.