रचना, अश्विनी विश्व चॅम्पियन्स

► वृत्तसंस्था / अॅथेन्स

येथे झालेल्या 17 वर्षांखालील वयोगटाच्या महिलांच्या विश्व कुस्ती चॅम्पियनशिप स्पर्धेत भारताच्या महिला मल्ल रचना आणि अश्विनी विष्णोई यांनी विश्व जेतेपद पटकावले तर भारताच्या मोनीचे सुवर्णपदक थोडक्यात हुकल्याने तिला उपविजेतेपदावर समाधान मानावे लागले.

रचनाने 43 किलो गटात तर अश्विनी विष्णोईने 65 किलो गटात विजेतेपद पटकाविले. मात्र 57 किलो गटात मोनीचे जेतेपद थोडक्यात हुकले. महिलांच्या 43 किलो वजन गटातील अंतिम लढतीत रचनाने चीनच्या झीन हुआंगचा 3-0 अशा गुणांनी एकतर्फी पराभव करत विश्वविजेतेपद आणि सुवर्णपदक पटकाविले.

महिलांच्या 65 किलो वजन गटातील अंतिम लढतीत अश्विनी विष्णोईने उझ्बेकच्या मुखायो रेकीमजोनोव्हाचा 3-0 असा एकतर्फी फडशा पाडत सुवर्णपदक मिळविले. महिलांच्या 57 किलो वजन गटात कझाकस्थानच्या युसमेनोव्हाने भारताच्या मोनीचा 6-5 अशा केवळ एका गुणाच्या फरकाने पराभव करत सुवर्णपदक पटकाविले. मोनीला रौप्य पदकावर समाधान मानावे लागले. महिलांच्या 49 किलो गटात भारताच्या कोमल वर्माने कांस्यपदक मिळविताना बुर्कीनाचा 8-3 असा पराभव केला. या स्पर्धेत भारताची आणखी दोन पदके निश्चित झाली आहेत. 61 किलो गटात भारताच्या यासीता तर 73 किलो गटात काजल यांनी अंतिम फेरीत प्रवेश मिळविला आहे. 69 किलो गटात भारताची मनीषा कांस्यपदकासाठी लढत देईल. या स्पर्धेत 40 किलो वजन गटात भारताच्या प्रिती यादवला तर 46 किलो गटात कशिश गुर्जरला हार पत्करावी लागली.