सबकनेक्शनचा पर्याय उपलब्ध करून द्या

नळ कनेक्शनबाबत एलअँडटीकडे वडगाववासियांची मागणी

बेळगाव : जुन्या घरांचा एकच पीआयडी क्रमांक असल्यामुळे त्या घरांमध्ये पाण्याचे एकच कनेक्शन मिळणार असल्याचे एलअँडटीकडून सांगण्यात आले. परंतु, एका घरामध्ये अनेक कुटुंबे असणाऱ्यांसमोर समस्या निर्माण झाली आहे. त्यामुळे एलअँडटीने किमान सबकनेक्शनचा पर्याय उपलब्ध करून द्यावा, अशी मागणी वडगावमधील नागरिकांनी एलअँडटी प्रशासनाकडे केली आहे. शुक्रवारी वडगाव परिसरात सपोर्ट ऑर्गनायझेशन व एलअँडटी कंपनीची नागरिकांसोबत संयुक्त बैठक पार पडली. या बैठकीमध्ये पाणीपुरवठ्याबाबत सविस्तर चर्चा करण्यात आली. राजवाडा कंपाऊंड, ज्ञानेश्वर मंदिर येथे झालेल्या या बैठकीला पाटील गल्ली, कारभार गल्ली, मंगाई मंदिर रोड व संभाजीनगर येथील नागरिक उपस्थित होते. 24 तास पाणीपुरवठा प्रकल्पाबाबत एलअँडटीकडून माहिती देण्यात आली.

ज्या ग्राहकांची जुनी पाणीपट्टी भरावयाची आहे, त्यांना नवीन कनेक्शन देऊन प्रत्येक महिन्याला 50 रुपये नव्या बिलातून घेतले जातील. महिन्याला आठ हजार लिटर पाण्याचा पुरवठा केला जाणार असून महिन्याला 110 रुपये पाणीपट्टी घेतली जाणार असल्याचे एलअँडटीकडून सांगण्यात आले. याला काही नागरिकांनी आक्षेप घेतला. प्रत्येक कनेक्शनला मीटर बसविले असल्याने जितका पाण्याचा वापर होईल, तितकीच पाणीपट्टी देणे आवश्यक असल्याचे नागरिकांनी सांगितले. एखादी व्यक्ती घर बंद करून गावाला गेल्यास त्याने विनाकारण पाणीपट्टी का भरावी? असा प्रश्न उपस्थित करण्यात आला. याचबरोबर एलअँडटीकडून खोदण्यात आलेल्या रस्त्यांच्या दुरवस्थेबाबत चर्चा करण्यात आली. यावेळी बी. एच. लक्कण्णावर, ए. एच. दोडमनी, भीमाप्पा, चंद्रलेखा, मनू यांच्यासह माजी नगरसेवक मनोहर हलगेकर, रमेश जुवेकर, यु. एस. गुरव, एम. एस. पाटील, सुरेश आजरेकर यासह इतर नागरिक उपस्थित होते.