प्रीतिस्मिता भोईचा युवा वेटलिफ्टिंगमध्ये नवा विश्वविक्रम

वृत्तसंस्था/ मनामा, बहरिन

भारताच्या प्रीतिस्मिता भोईने युवा आशियाई क्रीडा स्पर्धेत वेटलिफ्टिंगमध्ये नवा विश्वविक्रम नोंदवत सुवर्णपदक पटकावले. मुलींच्या 44 किलो वजन गटात क्लीन व जर्कमध्ये तिने हा नवा विक्रम केला.

16 वर्षीय भोईने क्लीन व जर्कमध्ये 92 किलो वजन उचलत युवा विश्वविक्रम नोंदवला. स्नॅचमध्ये तिने 66 किलोसह एकूण 158 किलो वजन उचलत पहिले स्थान पटकावले. मुलांच्या 60 किलो वजन गटातही भारताने रौप्यपदक मिळविले. क्लीन व जर्कमध्ये भोईने पहिल्या प्रयत्नात 87 किलो वजन उचलल्यानंतर दुसऱ्या प्रयत्नात 3 किलो जास्ती वजन उचलले आणि शेवटच्या प्रयत्नात तिने 92 किलो वजन उचलत नवा युवा विश्वविक्रम नोंदवला.

17 वर्षीय वेटलिफ्टर महाराजन अरुमुगापंडियनने मुलांच्या 60 किलो गटात रौप्य मिळविले. त्याने स्नॅचमध्ये 114 व क्लीन-जर्कमध्ये 142 असे एकूण 256 किलो वजन उचलले. चीनच्या चेन झुन्फाने एकूण 261 किलो वजन उचलत या गटात सुवर्ण पटकावले. भारताची एकूण पदकसंख्या आता 23 झाली असून त्यात 3 सुवणं, 9 रौप्य व 11 कांस्यपदकांचा समावेश आहे. शनिवारी भारताची पदकसंख्या 17 होती, त्यात 2 सुवर्ण, 6 रौप्य व 9 कांस्यपदके होती.