पंतप्रधान 15 पासून विदेश दौऱ्यावर

 जॉर्डन, इथिओपिया, ओमानला भेट देणार

वृत्तसंस्था/ नवी दिल्ली

पंतप्रधान नरेंद्र मोदी पुढील आठवड्यात परदेश दौऱ्यावर जाणार आहेत. 15 ते 18 डिसेंबरदरम्यान होणाऱ्या चार दिवसांच्या दौऱ्यात ते जॉर्डन, इथिओपिया आणि ओमान या तीन देशांचा प्रवास करतील. पंतप्रधान 15 ते 16 डिसेंबर दरम्यान जॉर्डनमधील हाशेमाइट किंगडमला भेट देतील. या दौऱ्यादरम्यान ते जॉर्डनचे राजा अब्दुल्ला द्वितीय बिन अल हुसेन यांची भेट घेतील. तसेच इथिओपियाच्या पंतप्रधानांच्या निमंत्रणावरून पंतप्रधान मोदी 16 ते 17 डिसेंबर दरम्यान इथिओपियाला राजकीय भेट देतील. पंतप्रधान मोदी यांचा हा इथिओपियाचा पहिलाच दौरा आहे. ते भारत-इथिओपिया द्विपक्षीय संबंधांच्या सर्व पैलूंवर पंतप्रधान डॉ. अबी अहमद अली यांच्याशी व्यापक चर्चा करतील. त्यानंतर ते ओमानला रवाना होणार असून ही भेट दोन्ही देशांच्या मैत्री आणि द्विपक्षीय सहकार्याच्या घनिष्ठ संबंधांना आणखी दृढ करण्याच्या सामायिक वचनबद्धतेची पुष्टी करणार आहे.

पंतप्रधान मोदी जॉर्डन दौऱ्यावेळी द्विपक्षीय संबंधांचा आढावा घेत प्रादेशिक मुद्यांवर विचारांची देवाण-घेवाण करतील. ही भेट दोन्ही देशांमधील राजनैतिक संबंधांच्या स्थापनेच्या 75 व्या वर्धापन दिनानिमित्त आहे. यामुळे भारत-जॉर्डन द्विपक्षीय संबंध अधिक मजबूत करण्याची, परस्पर विकास आणि समृद्धीसाठी सहकार्याचे नवीन मार्ग शोधण्याची आणि प्रादेशिक शांतता, समृद्धी, सुरक्षा आणि स्थिरता वाढवण्याच्या वचनबद्धतेची पुष्टी करण्याची संधी मिळणार आहे.