भडकल गल्ली कॉर्नर येथे रस्त्यामध्येच भगदाड

बेळगाव : भडकल गल्ली कॉर्नर येथे रस्त्यामध्येच भगदाड पडल्याने रस्ता वाहतुकीसाठी धोकादायक बनला आहे. चेंबरला लागूनच रस्ता खचला असून याठिकाणी मोठे भगदाड पडले आहे. कोणताही अपघात होऊ नये तसेच वाहनचालकांना खड्डा लक्षात यावा यासाठी त्यामध्ये उसाचे चिपाड उभे करण्यात आले आहे. अपघात होण्यापूर्वी याठिकाणी दुरुस्तीचे काम करण्याची मागणी होत आहे. शहराच्या मध्यवर्ती भागात असणाऱ्या भडकल गल्ली कॉर्नर येथे चेंबर शेजारीच रस्ता खचला आहे. काही दिवसांपूर्वी चेंबरसाठी खोदाई करण्यात आली होती. यावेळी घालण्यात आलेले भराव खचले असल्याने याठिकाणी भगदाड पडले असल्याची शक्यता वर्तविण्यात येत आहे. या रस्त्यावरून नेहमी वर्दळ असते. त्यामुळे अपघात होण्याची शक्यता आहे. एखाद्या निष्पापाचा बळी जाण्यापूर्वी दुरुस्तीचे काम करण्याची मागणी केली जात आहे.

सीडीवर्कचे काम अर्धवट स्थितीत

भडकल गल्ली कॉर्नर येथील सीडीवर्कचे काम मागील अनेक वर्षांपासून अर्धवट स्थितीत आहे. यापूर्वी महानगरपालिका अधिकारी तसेच महापौरांनी अनेकवेळा या कामाची पाहणी करून देखील त्या कामाचा शुभारंभ करण्यात आलेला नाही. या परिसरात बाजार भरत असल्याने अनेकवेळा अपघात होत आहेत. त्यामुळे महापालिकेने या ठिकाणच्या सीडीवर्कचे काम लवकर पूर्ण करून नागरिकांना दिलासा देणे गरजेचे आहे.