पंतप्रधान मोदी ‘ब्रिक्स’ परिषदेस जाणार

ब्राझीलमध्ये 6 ते 8 जुलै दरम्यान आयोजन : या परिषदेला जोडून अन्य चार देशांचा दौराही करणार

वृत्तसंस्था/ नवी दिल्ली

यंदाची ‘ब्रिक्स’ शिखर परिषद ब्राझीलमध्ये असून पंतप्रधान नरेंद्र मोदी या परिषदेला उपस्थित राहण्यासाठी त्या देशाच्या दौऱ्यावर जाणार आहेत, अशी माहिती त्यांच्या कार्यालयाकडून देण्यात आली आहे. ब्राझीलच्या दौऱ्याला जोडून ते अन्य चार देशांचा दौराही करणार आहेत. ‘ब्रिक्स’ परिषदेत ते पहलगाम येथील दहशतवादी हल्ला, पाकिस्तानकडून होणारे दहशतवादाचे पोषण, भारताचे ‘सिंदूर’ अभियान हे मुद्दे प्रकर्षाने उपस्थित करणार आहेत, असेही स्पष्ट करण्यात आले.

ब्राझीलमधील ब्रिक्स परिषद 6 जुलै ते 8 जुलै अशी तीन दिवस होणार आहे. तत्पूर्वी पंतप्रधान नरेंद्र मोदी 2 जुलैला भारतातून प्रयाण करून घाना या देशाला भेट देतील. त्यानंतर 2 आणि 3 जुलैला ते घानामधील विविध कार्यक्रमांना भेट देण्यासोबतच द्विपक्षीय चर्चा करतील. त्यानंतर 3 आणि 4 जुलैला ते त्रिनिदाद अँड टोबॅगो येथे जातील. त्यापाठोपाठ 4 आणि 5 जुलैला अर्जेंटिना येथे पोहोचतील. 6 जुलैला ब्रिक्स परिषद ब्राझीलची राजधानी रिओ डी जानेरो येथे होणार आहे. ब्रिक्स परिषद संपल्यानंतर ते अंतिम टप्प्यात 9 जुलैला नामिबिया या देशांच्या दौऱ्यावरही जाणार आहेत. त्यांचा त्रिनिदाद आणि टोबॅगो दौरा महत्वाच्या मानण्यात येत आहे. तसेच घाना देशाला भेट देणारे ते गेल्या 30 वर्षांमधील प्रथम भारतीय नेते ठरणार आहेत.

परिषदेत काय मांडणार...

ब्रिक्स परिषदेत पंतप्रधान नरेंद्र मोदी जागतिक प्रशासन, शांतता-सुरक्षा, बहुविधत्व बळकट करणे, कृत्रिम बुद्धिमत्तेचा उत्तरदायी पद्धतीने उपयोग, पर्यावरण संरक्षण, जागतिक आरोग्य आणि आर्थिक तसेच औद्योगिक मुद्दे आणि त्यांच्यासंबंधी भारताची भूमिका मांडणार आहेत. पहलगाम हल्ला आणि त्याला अनुषंगून दहशतवादाचा मुद्दा ते प्रकर्षाने मांडतील, अशी माहिती देण्यात आली.

अनेक द्विपक्षीय बैठका

‘ब्रिक्स’ परिषदेच्या निमित्ताने पंतप्रधान नरेंद्र मोदी या परिषदेचे सदस्य असणाऱ्या अनेक देशांच्या प्रमुखांची स्वतंत्ररित्या चर्चा करणार आहेत. या परिषदेला ते ब्राझीलचे नेते लुला डिसिल्वा यांच्या आमंत्रणावरून जात आहेत. दोन्ही नेत्यांची द्विपक्षीय संबंध, गुंतवणूक आणि व्यापारवृद्धीसंबंधी चर्चा होणार आहे. ब्रिक्स परिषदेत ब्राझील, रशिया, भारत, चीन आणि दक्षिण आफ्रिका असे सहा देश आहेत. त्यांच्यासह आणखी पाच देश या संघटनेचे अतिथी देश आहेत. ही प्रामुख्याने आर्थिक व्यवहारांसंबंधीची संघटना आहे. पंतप्रधान नरेंद्र मोदी यांची चीनचे नेते जिनपिंग यांच्याशी चर्चा होणार का, असा प्रश्न आहे. मात्र, अशी कोणतीही द्विपक्षीय भेट ठरलेली नाही, असे स्पष्ट करण्यात आले.

एससीओच्या पार्श्वभूमीवर महत्व

नुकतीच चीनमध्ये एससीओच्या संरक्षणमंत्र्यांची परिषद झाली आहे. या परिषदेत संयुक्त निवेदन प्रसारित केले जाणार होते. भारताने पाकिस्तान आणि दहशतवाद या मुद्द्यांवर बोटचेपी भूमिका असलेल्या या संयुक्त निवेदनावर स्वाक्षरी करण्यास भारताने नकार दिला होता. त्यामुळे संयुक्त निवेदन प्रसिद्ध करण्यात आले नव्हते. या पार्श्वभूमीवर ही ‘ब्रिक्स’ परिषद होत आहे. या परिषदेतही पाकिस्तान पुरस्कृत दहशतवादाचा मुद्दा गाजणार आहे, असे दिसून येत आहे.