परिणीति युट्यूबवर चाहत्यांशी साधणार संवाद

युट्यूब चॅनेलद्वारे स्वत:च्या जीवनाविषयी माहिती देणार

अभिनेत्री परिणीति चोप्रा आता लोकांशी थेट जोडली जाण्यास तयार आहे. परिणीति आता स्वत:चे युट्यूब चॅनेल सुरू करणार आहे. यामुळे तिच्या चाहत्यांना मोठा आनंद झाला आहे. परिणीतिने इन्स्टाग्राम हँडलद्वारे एक व्हिडिओ शेअर करत नव्या यूट्यूब चॅनेलविषयी माहिती दिली आहे. यावर ती स्वत:च्या दैनंदिन जीवनाची झलक चाहत्यांना दाखविणार आहे.

इतक्या वर्षांमध्ये मी जाणूनबुजून स्वत:च्या जीवनाचा जवळपास एक टक्का हिस्साच सोशल मीडियावर शेअर केला आहे. मी स्वत:च्या आयुष्यात बरेच काही करत असते, परंतु नेहमीच हे सर्व खासगी ठेवणे पसंत करते असे तिने म्हटले आहे.

काहीही न शेअर करण्याच्या माझ्या निर्णयाने माझ्या सोशल मीडिया टीमला गंभीर स्वरुपात निराश केले आहे. आता त्यांनी खूप समजूत काढल्यावर आता काही प्रमाणात खुलण्याची वेळ आल्याचे वाटत आहे. आता मी युट्यूब चॅनेलवरून चाहत्यांना माझ्या आयुष्याशी निगडित माहिती देत राहणार असल्याचे परिणीतिने म्हटले आहे.

परिणीति चोप्रा अलिकडेच ‘अमर सिंह चमकीला’ या चित्रपटात दिसून आली होती. या चित्रपटात तिच्यासोबत दिलजीत दोसांझ देखील होता. इम्तियाज अली यांच्याकडून दिग्दर्शित या चित्रपटाला प्रेक्षकांकडून दाद मिळाली होती. तसेच परिणीतिच्या व्यक्तिरेखेला कौतुकाची थाप मिळाली होती.