वनडे मालिकेत पाकची विजयी आघाडी

लंकेचा 8 गड्यांनी पराभव, बाबर आझम ‘सामनावीर’

वृत्तसंस्था / रावळपिंडी

‘सामनावीर’ बाबर आझमचे नाबाद शतक तसेच फर्क झमान आणि मोहम्मद रिझवान यांच्या अर्धशतकांच्या जोरावर यजमान पाक क्रिकेट संघाने तीन सामन्यांच्या वनडे मालिकेत 2-0 अशी विजयी आघाडी मिळविताना दुसऱ्या सामन्यात लंकेचा 8 गड्यांनी दणदणीत पराभव केला.

या सामन्यात पाकने नाणेफेक जिंकून लंकेला प्रथम फलंदाजी दिली. लंकेने 50 षटकात 8 बाद 288 धावा जमवित पाकला विजयासाठी 289 धावांचे आव्हान दिले. पाकने 48.2 षटकात 2 बाद 289 धावा जमवित हा सामना आणि मालिका जिंकली आहे. आता या मालिकेतील शेवटचा सामना बाकी असून पाकचा संघ लंकेचा व्हाईटवॉश करण्यासाठी आतुरलेला आहे.

लंकेच्या डावामध्ये लियानगेने 63 चेंडूत 1 षटकार आणि 2 चौकारांसह 54, समरविक्रमाने 52 चेंडूत 1 षटकार आणि 3 चौकारांसह 42, कमिल मिशाराने 2 चौकारांसह 27, निशांकाने 4 चौकारांसह 24, कुशल मेडीसने 2 चौकारांसह 20, कमिंदु मेंडीसने 38 चेंडूत 2 षटकार आणि 4 चौकारांसह 44 तर हसरंगाने 26 चेंडूत 3 चौकारांसह नाबाद 37 धावा जमविल्या. लंकेला 23 अवांतर धावा मिळाल्या. पाकच्या अचूक गोलंदाजीसमोर लंकेचे फलंदाज ठराविक अंतराने बाद झाले. पहिल्या 10 षटकात लंकेची स्थिती 1 बाद 51 अशी होती. दुसऱ्या पावरप्ले दरम्यान लंकेने 162 धावा जमविताना चार गडी गमविले. लियानगेने 56 चेंडूत 1 षटकार आणि 2 चौकारांसह अर्धशतक झळकविले. निशांका आणि निशारा यांनी सलामीच्या गड्यासाठी 51 धावांची भागिदारी केली. त्यानंतर लंकेचे आणखीन तीन फलंदाज 47 धावांत बाद झाले. समरविक्रमा आणि लियानगे यांनी पाचव्या गड्यासाठी 61 धावांची भागिदारी केली. समरविक्रमा बाद झाल्यानंतर लिगायनगेने कमिंदु मेंडीससमवेत सहाव्या गड्यासाठी 73 धावांची भर घातली. लंकेच्या डावात 4 षटकार आणि 23 चौकार नोंदविले गेले. पाकतर्फे हॅरीस रौफने 66 धावांत 3 तर अब्रार अहमदने 41 धावांत 3 तसेच मोहम्मद वासीमने 50 धावांत 1 गडी बाद केला.

प्रत्युत्तरादाखल खेळताना पाकच्या पहिल्या चारही फलंदाजांनी दमदार फलंदाजी केली. फक्र झमान आणि सईम आयुब यांनी सलामीच्या गड्यासाठी 9.4 षटकात 77 धावांची भागिदारी केली. चमीराने सईम आयुबला झेलबाद केले. त्याने 25 चेंडूत 1 षटकार आणि 5 चौकारांसह 33 धावा जमविल्या.

फक्र झमान आणि बाबर आझम यांनी दुसऱ्या गड्यासाठी 100 धावांची शतकी भागिदारी केली. झमानने 93 चेंडूत 1 षटकार आणि 8 चौकारांसह 78 धावा झळकविल्या. झमानने 64 चेंडूत 5 चौकारांसह अर्धशतक पूर्ण केले तर बाबर आझमने 68 चेंडूत 3 चौकारांसह अर्धशतक झळकविले. या जोडीने 125 चेंडूत शतकी भागिदारी नोंदविली. पाकने पावरप्ले दरम्यानच्या पहिल्या 10 षटकात 77 धावा जमविताना 1 गडी गमविला. पाकने दुसऱ्या पावरप्ले दरम्यानच्या 30 षटकात 158 धावा झोडपताना 1 गडी गमविला. बाबर आझमने 115 चेंडूत 8 चौकारांसह आपले शतक झळकविले. त्याला मोहम्मद रिझवानकडून चांगली साथ मिळाली. रिझवानने 54 चेंडूत 1 षटकार आणि 5 चौकारांसह नाबाद 51 तर आझमने 119 चेंडूत 8 चौकारांसह नाबाद 102 धावा जमवित तिसऱ्या गड्यासाठी अभेद्य 112 धावांची शतकी भागिदारी करत संघाच्या विजयावर शिक्कामोर्तब केला. पाकने हा सामना 10 चेंडू बाकी ठेवून जिंकला. लंकेतर्फे चमिराने 58 धावांत 2 गडी बाद केले.

संक्षिप्त धावफलक: लंका 50 षटकात 8 बाद 288 (लियानगे 54, समरविक्रमा 42, कमिंदु मेंडीस 44, हसरंगा नाबाद 37, निशांका 24, कमिल मिशारा 27, कुशल मेंडीस 20, अवांतर 23, हॅरीस रौफ 3-66, अब्रार अहमद 3-41, मोहम्मद वासीम 1-50), पाक 48.2 षटकात 2 बाद 289 (बाबर आझम नाबाद 102, मोहम्मद रिझवान नाबाद 51, फक्र झमान 78, सईम आयुब 33, अवांतर 25, चमिरा 2-58).