शेवटचा सामना जिंकून पाकने टाळला व्हाईटवॉश
बांगलादेशचा मालिका विजय, साहिबजादा फरहान ‘सामनावीर’, जाकेर अली ‘मालिकावीर’
वृत्तसंस्था / ढाका
यजमान बांगलादेशने तीन सामन्यांच्या टी-20 मालिकेत पाकचा 2-1 अशा फरकाने पराभव केला. या मालिकेतील शेवटच्या सामन्यात पाकने बांगलादेशचा 74 धावांनी पराभव करत आपला संभाव्य व्हाईटवॉश टाळला. पाकच्या एस. फरहानला ‘सामनावीर’ तर बांगलादेशच्या जाकेर अलीला ‘मालिकावीर’ म्हणून घोषित करण्यात आले.
या शेवटच्या सामन्यात बांगलादेशने नाणेफेक जिंकून पाकला प्रथम फलंदाजी दिली. पाकने 20 षटकात 7 बाद 178 धावा जमविल्यानंतर बांगलादेशचा डाव 16.4 षटकात 104 धावांत आटोपला.
पाकच्या डावामध्ये सलामीच्या साहीबजादा फरहानने 41 चेंडूत 5 षटकार आणि 6 चौकारांसह 63, सईम आयुबने 15 चेंडूत 1 षटकार आणि 2 चौकारांसह 21, हसन नवाजने 17 चेंडूत 3 षटकार आणि 1 चौकारासह 33, कर्णधार सलमान आगाने 1 षटकारासह नाबाद 12 तर मोहम्मद नवाजने 16 चेंडूत 2 षटकार आणि 2 चौकारांसह 27 धावा जमविल्या. पाकच्या डावात 12 षटकार आणि 12 चौकार नोंदविले गेले. बांगलादेशतर्फे तस्किन अहमदने 38 धावांत 3, नेसुम अहमदने 22 धावांत 2 तसेच एस. इस्लाम आणि मोहम्मद सैफुद्दीन यांनी प्रत्येकी 1 गडी बाद केला. पाकने पॉवरप्लेच्या 6 षटकात 57 धावा जमविल्या. 10 षटकाअखेर पाकने 1 बाद 86 धावा जमविल्या होत्या. फरहानने 29 चेंडूत 5 षटकार आणि 4 चौकारांसह अर्धशतक झळकविले.
प्रत्युत्तरादाखल दाखल खेळताना बांगलादेशच्या डावात मोहम्मद सैफुद्दीनने 34 चेंडूत 2 षटकार आणि 2 चौकारांसह नाबाद 35, नेसुम अहमदने 2 चौकारांसह 13, मोहम्मद नईमने तसेच मेहदी हसनने प्रत्येकी 10 धावा जमविल्या. बांगलादेशच्या डावात 1 षटकार आणि 9 चौकार नेंदविले गेले. बांगलादेशने पॉवरप्ले दरम्यानच्या 6 षटकात 29 धावा जमविताना 5 गडी गमविले. पाकतर्फे सलमान मिर्झाने 20 डावांत 3 तर फईम अश्रफ व मोहम्मद नवाज यांनी प्रत्येकी 2 तर अहमद दानियाल व सलमान आगा तसेच हुसेन तलत यांनी प्रत्येकी 1 गडी बाद केला.
संक्षिप्त धावफलक : पाक 20 षटकात 7 बाद 178 (एस. फरहान 63, सईम आयुब 21, हसन नवाज 33, सलमान आगा नाबाद 12, मोहम्मद नवाज 27, अवांतर 11, टी. अहमद 3-38, एन. अहमद 2-22, एस. इस्लाम, मोहम्मद सैफुद्दीन प्रत्येकी 1 बळी), बांगलादेश 16.4 षटकात सर्वबाद 104 (सैफुद्दीन नाबाद 35, नेसुम अहमद 13, मोहम्मद नईम 10, मेहदी हसन 10, सलमान मिर्झा 3-20, फईम अश्रफ व मोहम्मद नवाज प्रत्येकी 2 बळी, अहमद दानियाल, सलमान आगा व हुसेन तलत प्रत्येकी 1 बळी).