अधिकारी, कर्मचाऱ्यांनी नियमांचे पालन करावे

जिल्हाधिकारी भुबलन यांची सूचना

वार्ताहर /विजापूर

मतमोजणीसाठी विहित केलेल्या सूचनांमध्ये कोणताही बदल न करता नियमांचे पालन करून मतमोजणी यशस्वी करण्याचे आदेश जिल्हाधिकारी टी. भुबलन यांनी दिले. शहरातील कंदगल हणमंतराय नाट्यागृहात आयोजित लोकसभा निवडणूक-2024 च्या मतमोजणी पूर्वतयारी प्रशिक्षणाच्या अध्यक्षस्थानी असलेल्या जिल्हाधिकाऱ्यांनी मतमोजणीसाठी नेमलेल्या अधिकारी व कर्मचाऱ्यांना मार्गदर्शन केले. 4 जून रोजी विजापूर सैनिक शाळेत मतमोजणी प्रक्रिया पार पडणार आहे. त्या दिवशी सकाळी 8 वाजल्यापासून मतमोजणीची प्रक्रिया सुरू होणार आहे. मतमोजणीसाठी नेमलेल्या अधिकारी व कर्मचाऱ्यांनी योग्य प्रशिक्षण घेऊन मतमोजणी प्रक्रियेत कोणतीही त्रुटी राहणार नाही याची काळजी घ्यावी, असे आवाहन केले. मतमोजणी हॉलमध्ये मोबाईल आणण्यास मनाई आहे. मतमोजणी सभागृहात पोलीस, सुरक्षा कर्मचाऱ्यांना विनाकारण प्रवेश मिळणार नाही. उमेदवार मंत्री, राज्यमंत्री आणि केंद्रीय मंत्री यांना मतमोजणी सभागृहात प्रवेश दिला जाणार नाही. मतमोजणी सुरू होण्यापूर्वी त्यांनी व्हीव्हीपॅट चालू करून, निकालाचे बटण दाबून आणि अत्यंत काळजीपूर्वक बंद करून त्यांना दिलेल्या सूचनांनुसार कार्य करावे. मोजणी एजंटांशी शांत रहा आणि त्यांना काही शंका असल्यास ते दूर करा. मोजणीनंतर लगेचच प्रत्येक ईव्हीएममध्ये आकडे अचूकपणे नोंदवले जावेत, असे सांगितले. अक्का महादेवी महिला विद्यापीठाचे कुलपती शंकर गौडा सोमनाला यांनी प्रशिक्षणासाठी आलेल्या कर्मचाऱ्यांना मतमोजणीची प्रक्रिया, ईव्हीएम मशीन आणि व्हीव्हीपीएटीची कार्यप्रणाली आणि त्यांचा वापर करण्याच्या पद्धती याविषयी प्रात्यक्षिक दिले.