ओडिशा वॉरियर्स महिला हॉकी इंडिया लीगचे विजेते

वृत्तसंस्था/ रांची

येथे झालेल्या पहिल्या महिलांच्या हॉकी इंडिया लीग स्पर्धेत ओडीशा वॉरियर्सने जेतेपद पटकाविले. या स्पर्धेतील अंतिम सामन्यात ओडिशा वॉरियर्सने जेएसडब्ल्यू सुरमा हॉकी क्लबचा 2-1 अशा गोलफरकाने पराभव केला.

ओडिशा वॉरियर्स आणि सुरमा हॉकी क्लब यांच्यातील हा अंतिम सामना शेवटपर्यंत चुरशीचा झाला. दोन्ही संघांनी आक्रमक आणि वेगवान खेळावर भर दिला होता. दरम्यान पहिल्या 15 मिनिटांच्या कालावधीत दोन्ही संघांना आपले खाते उघडता आले नाही. 20 व्या मिनिटाला ऋतुजा पिसाळने ओडिशा वॉरियर्सचे खाते उघडले. मध्यंतराला 2 मिनिटे बाकी असताना पेनी स्क्विबने सुरमा हॉकी क्लबला बरोबरी साधून दिली. या सामन्यात शेवटच्या 5 मिनिटांच्या कालावधीत दोन्ही संघांनी निर्णायक गोल करण्यासाठी चांगलीच झटापट केली. दरम्यान 56 व्या मिनिटाला. ऋतुजा पिसाळने आपला वैयक्तिक आणि संघाचा दुसरा निर्णायक गोल करत हॉकी लीग स्पर्धेचे अजिंक्यपद आपल्या संघाला मिळवून दिले.

या स्पर्धेत ज्योतीची सर्वोत्तम हॉकीपटू म्हणून निवड करण्यात आली. तसेच सूरमाची गोलरक्षक सविताची सर्वोत्तम गोलरक्षक म्हणून घोषणा करण्यात आली. सुरमा क्लबची सोनम हिची या स्पर्धेत सर्वोत्तम उदयोन्मुख खेळाडू म्हणून निवड करण्यात आली. या संपूर्ण स्पर्धेत ओडिशा वॉरियर्सची यिबी जान्सेन आणि सुरमा हॉकी क्लबची चार्लोट यांनी सर्वाधिक गोल केले आहेत.