आता थायलंड अन् कंबोडिया या दोन देशांमध्ये युद्धाचे वारे

सीमेवर सैन्याची जमवाजमव : तणावाची स्थिती

वृत्तसंस्था/ बँकॉक

भारत आणि पाकिस्ताननंतर आणखी दोन आशियाई देशांमध्ये युद्धसदृश परिस्थिती निर्माण झाली आहे. थायलंड आणि कंबोडियाने सीमेवर मोठ्या प्रमाणात सैन्य तैनात केले आहे. कंबोडियातून सैन्य वाढवल्यानंतर थायलंडने वादग्रस्त सीमावर्ती भागात आपली लष्करी उपस्थिती मजबूत केली असल्याचे थायलंडच्या संरक्षणमंत्र्यांनी सांगितले. आग्नेय आशियाई देशांच्या गटाचे ‘आसियान’चे विद्यमान अध्यक्ष आणि मलेशियाचे पंतप्रधान अन्वर इब्राहिम यांनी शांतता प्रस्थापित करण्यासाठी अनेक प्रयत्न केले, परंतु ते यशस्वी होऊ शकले नाहीत. पूर्व आशियातील शांतता प्रयत्नांना हा मोठा धक्का मानला जात आहे. दोन्ही देशांचे चीनशीही मजबूत द्विपक्षीय संबंध आहेत.

28 मे रोजी सीमांकित नसलेल्या सीमावर्ती भागात झालेल्या चकमकीत कंबोडियन सैनिकाचा मृत्यू झाल्यानंतर दोन्ही आग्नेय आशियाई देशांमध्ये तणाव वाढला आहे. गेल्या काही दिवसांपासून दोन्ही सरकारे संवादासाठी वचनबद्धता व्यक्त करणारी सावध विधाने करत आहेत. सीमेवर लष्करी उपस्थिती वाढविल्यामुळे तणाव वाढला आहे. थाई सरकारने अतिरिक्त पावले उचलण्याचा आणि त्यांची लष्करी स्थिती मजबूत करण्याचा निर्णय घेतला आहे. तथापि, त्यांनी दोन्ही बाजूंनी सीमेवर सैन्य तैनात करण्याबद्दल जास्त माहिती दिली नाही. कंबोडियन सैनिक आणि नागरिकांनी थायलंडच्या सीमेत वारंवार घुसखोरी केली आहे. थाई सैन्याने याला चिथावणी देण्याचा आणि लष्करी बळ तैनात करण्याचा स्पष्ट प्रयत्न म्हटले आहे.

सार्वभौमत्वावरून वाद

थायलंड आणि कंबोडिया सुमारे 817 किलोमीटरची जमीन सीमा सामायिक करतात. गेल्या शंभर वर्षांपासून दोन्ही देश या सीमेच्या अनेक भागांवर सार्वभौमत्वावरून लढत आहेत. ही सीमा पहिल्यांदा 1907 मध्ये फ्रान्सने नकाशावर दाखवली होती, जेव्हा कंबोडिया फ्रेंच वसाहत होती. 2008 मध्ये दोन्ही देशांमध्ये 11 व्या शतकातील हिंदू मंदिरावरून वाद झाल्यामुळे अनेक वर्षे संघर्ष सुरू राहिला. यात किमान बारा लोकांचा मृत्यू झाला. या वादादरम्यान 2011 मध्येही पुन्हा दोन्ही देशांमध्ये संघर्ष झडला होता.