‘स्काय फोर्स’मध्ये निमरत कौर

अक्षय कुमारसोबत पुन्हा झळकणार

अभिनेत्री निमरत कौरने स्वत:ची बहुमुखी प्रतिभा आणि दमदार अभिनयाद्वारे स्वत:ची ओळख निर्माण केली आहे. एका दशकापेक्षा अधिक कालावधीच्या कारकीर्दीत तिने वेगवेगळ्या भूमिका साकारण्याची क्षमता सिद्ध केली आहे. अभिनेत्री आता ‘स्काय फोर्स’ या चित्रपटात मुख्य भूमिका साकारणार आहे. या चित्रपटात अक्षय कुमार आणि सारा अली खानही दिसून येणार आहे.

हा चित्रपट पुढील वर्षी प्रदर्शित होणार आहे. या चित्रपटाच्या निमित्ताने अक्षय आणि निमरत यांची जोडी 8 वर्षांनी पुन्हा दिसून येणार आहे. यापूर्वी एअरलिफ्ट या चित्रपटात दोघेही दिसून आले होते. निमरतचा स्काय फोर्स हा चित्रपट 26 जानेवारीच्या आसपास प्रदर्शित होणार आहे.

या चित्रपटाचा ट्रेलर नाताळावेळी प्रदर्शित केला जाणार आहे. निमरतने यापूर्वी लंचबॉक्स या चित्रपटातील अभिनयाद्वारे प्रेक्षकांची मने जिंकली होती. तसेच तिने अनेक जागतिक वेबसीरिजमधून स्वत:च्या अभिनयाची चुणूक दाखवून दिली आहे. निमरत आगामी काळात अनेक चित्रपटांमध्ये दिसून येणार आहे.