टेस्लाच्या कर्मचाऱ्यांना घेतले मस्क यांनी फैलावर

आगामी काळात 20 टक्के कर्मचारी कपात

टेक्सास : टेस्ला या दिग्गज कंपनीचे सर्वेसर्वा एलॉन मस्क यांनी अलीकडेच आपल्या कर्मचाऱ्यांना चांगलेच सुनावले असल्याची माहिती उपलब्ध झाली आहे. आगामी काळामध्ये कंपनी 20 टक्के कर्मचाऱ्यांना कमी करणार असल्याचेही बोलले जात आहे. कंपनीने चार महिने आधी एका नव्या विपणन संघाची स्थापना केली होती. याचे नेतृत्व वरिष्ठ व्यवस्थापक एलन इंग्राम यांच्याकडे आहे. याच दरम्यान कंपनीचे सर्वेसर्वा एलॉन मस्क यांनी अलीकडेच या नव्या संघातील कर्मचाऱ्यांना चांगलेच फैलावर घेतले असल्याचे सांगितले जात आहे. कंपनी सध्या अतिरिक्त खर्चावर मर्यादा आणत खर्च कमीत कमी करण्याच्या दिशेने वाटचाल करते आहे.

किती जणांना करणार कमी

या अंतर्गतच आगामी काळामध्ये 20 टक्के इतके कर्मचारी कमी केले जाणार असून त्यांची संख्या 20 हजाराच्या घरात असेल असेही बोलले जात आहे. जागतिक स्तरावरती कंपनीच्या इलेक्ट्रिक वाहनांच्या विक्रीवरती नकारात्मक परिणाम झाला असल्याने एलॉन मस्क हे सध्या चिंतेत असल्याचे सांगितले जाते. स्पर्धा इतकी ताणली गेली आहे की काही देशातील कार्सच्या किमती देखील कंपनीने कमी केल्याचे बोलले जाते.

बातमीचा समभागावर परिणाम

कर्मचारी कमी करण्याच्या बातमीनंतर टेस्लाच्या समभागावरती शेअर बाजारात नकारात्मक परिणाम दिसून आला. टेस्लाचे समभाग जवळपास तीन टक्के इतके घसरणीत दिसून आले. गेल्या वर्षभरामध्ये पाहता टेस्लाच्या समभागामध्ये 40 टक्क्यांची घसरण नोंदवली गेली आहे.