मस्क 400 अब्ज डॉलर्सच्या संपत्तीसह जगातील सर्वात श्रीमंत

टेस्लाच्या समभागात निव्वळ संपत्तीमध्ये झपाट्याने वाढ : जेफ बेझोस दुसऱ्या स्थानी

वृत्तसंस्था/वॉशिंग्टन

एलॉन मस्कने इतिहास रचला! ते जगातील पहिले सर्वात श्रीमंत व्यक्ती बनले आहेत. त्यांच्या संपत्तीने 33,938 कोटी (अंदाजे 400 अब्ज डॉलर) चा आकडा ओलांडला आहे. ही माहिती ब्लूमबर्ग अब्जाधीश निर्देशांकानुसार आहे. त्याच्या या यशामागील एक प्रमुख कारण म्हणजे त्यांची कंपनी स्पेसएक्समधील शेअर्सची विक्री, ज्याने त्याच्या 4,242 कोटी (सुमारे 50 अब्ज डॉलर) निव्वळ संपत्तीमध्ये योगदान दिले आहे.

स्पेसएक्स शेअर विक्रीतून वाढलेली मालमत्ता

ब्लूमबर्गच्या अहवालानुसार, स्पेसएक्सने नुकतेच कर्मचारी आणि कंपनीच्या अंतर्गत व्यक्तींकडून सुमारे 1.25 अब्ज डॉलर किमतीचे शेअर्स परत विकत घेण्याचा निर्णय घेतला. या व्यवहारामुळे कंपनीचे मूल्य जवळपास 350 अब्ज डॉलर इतके वाढले, ज्यामुळे स्पेसएक्स जगातील सर्वात मौल्यवान खासगी स्टार्टअप बनले आहे. अहवालानुसार, एलॉन मस्क यांच्याकडे कंपनीचे 42 टक्के समभाग आहेत. या करारानंतर, एलॉन मस्क यांची एकूण संपत्ती लक्षणीय वाढली, जी आता 439.2 अब्ज डॉलरवर पोहोचली आहे. यामागील आणखी एक कारण म्हणजे टेस्लाच्या शेअर्सने नवीन विक्रमी उच्चांक गाठला, ज्यामुळे मस्कच्या संपत्तीत आणखी वाढ झाली आहे.

ट्रम्प यांच्या विजयाचा परिणाम

अमेरिकेच्या राजकीय परिस्थितीने एलॉन मस्कच्या 400 अब्ज डॉलर्सच्या संपत्तीवरही मोठ्या प्रमाणात परिणाम केला आहे, विशेषत: डोनाल्ड ट्रम्प अध्यक्ष म्हणून निवडून आल्यानंतर. ट्रम्पच्या विजयानंतर, मस्कच्या नेतृत्वाखालील टेस्लाच्या शेअर्समध्ये सुमारे 65 टक्के वाढ झाली आहे. यासह, टेस्लाच्या समभागांनी 415 डॉलरचा विक्रमी उच्चांक गाठला. गुंतवणूकदारांना आशा आहे की ट्रम्प प्रशासन सेल्फ-ड्रायव्हिंग कारसाठी नियम सुलभ करेल आणि टेस्लाच्या प्रतिस्पर्ध्यांना फायदा होणारी कर क्रेडिट्स दूर करणार असल्याची माहिती आहे. एलॉन मस्क यांची नव्याने तयार करण्यात आलेल्या सरकारी कार्यक्षमतेच्या  विभागाचे सह-प्रमुख म्हणून नियुक्ती करण्यात आली आहे. हा अधिकृत सरकारी विभाग नसला तरी, फेडरल खर्च आणि ऑपरेशन्सवर शिफारशी करणे अपेक्षित आहे.