दोडामार्गात गुणवंत विद्यार्थी व ज्येष्ठ नागरिकांचा सत्कार

कोनाळकट्टा ठाकर समाज व माऊली बहुउद्देशीय स़ंस्था यांचे आयोजन

दोडामार्ग - वार्ताहर

कोनाळकट्टा येथील नवहौशी ठाकर समाज कला-क्रिडा मंडळ व माऊली बहुउद्देशीय स़ंस्था कोनाळकट्टा यांच्या संयुक्त विद्यमाने दिपावलीचे औचित्य साधून गुणवंत विद्यार्थी,समाजातील पदोन्नती झालेले सरकारी कर्मचारी व समाजातील ६० वर्षावरील ज्येष्ठ नागरिकांचा यथोचित सत्कार करण्यात आला. इ.१० वी ,१२वी तील उत्तीर्ण विद्यार्थी,विविध स्पर्धा परीक्षा,विविध स्पर्धा मधील यशस्वी विद्यार्थी व उच्चशिक्षण प्राप्त अश्या २० विद्यार्थ्यांचे मंडळ व संस्थेच्या वतीने सन्मानचिन्ह ,प्रशस्तिपत्र व गुलाबपुष्प देऊन गौरव करण्यात आला.

ठाकर समाजातील सरकारी सेवांमध्ये पदोन्नती प्राप्त ८ समाजबांधवांचे यावेळी शाल ,श्रीफळ व गुलाबपुष्प देऊन सन्मान करण्यात आला.या सत्कार कार्यक्रमाचे वैशिष्ट्य हे होतं की यावेळी समाजातील ६० वर्षावरील २९ ज्येष्ठ व्यक्ती, कष्टकरी महिला-पुरुष यांचा शाल, श्रीफळ व गुलाबपुष्प देऊन यथोचित सन्मान करण्यात आला.आयुष्यभर केलेल्या कष्टाच्या ऋणातून थोडसं उतराई होण्याचा हा केलेला प्रयत्न म्हणजे मंडळ व माऊली संस्थेचा एक आगळा वेगळा उपक्रम ठरला.

नुतन कोनाळकट्टा ग्रा.पंचायत सदस्य,मंडळाचे माजी अध्यक्ष ,उपाध्यक्ष व सचिव यांनी मंडळासाठी दिलेल्या भरीव योगदानाबद्दल त्यांचाही शाल,श्रीफळ व गुलाबपुष्प देऊन सत्कार करण्यात आला.या अनोख्या सत्कार सोहळ्याची संकल्पना मंडळ व माऊली संस्थेचे अध्यक्ष श्री.रामा विश्राम ठाकूर यांची होती.त्यांच्याच अध्यक्षतेखाली हा कार्यक्रम संपन्न झाला.या कार्यक्रमाचे प्रास्तविक श्री.रामा विश्राम ठाकूर यांनी केले तर सूत्रसंचालन श्री .विजय ठाकर व प्रविण ठाकर यांनी केले.या कार्यक्राला कोनाळकट्टा येथील ठाकर समाजबांधव , मंडळाचे सर्व पदाधिकारी व माऊली बहुउद्देशीय संस्थेचे संचालक मंडळ मोठ्या संख्येने उपस्थित होते.