माऊली स्पोर्ट्स देसूर, निल बॉईज हिंडलगा विजयी

साईराज चषक अखिल भारतीय टेनिसबॉल स्पर्धा

बेळगाव : साईराज स्पोर्ट्स क्लब आयोजित साईराज चषक अखिल भारतीय टेनिसबॉल क्रिकेट स्पर्धेत सोमवारी खेळविण्यात आलेल्या विविध सामन्यातून माऊली स्पोर्ट्स देसूरने झारा इलेव्हनचा, निल बॉईज हिंडलगाने जेएसपी बॉईजचा, साईराज ब ने एसजी बॉईजचा तर निल बॉईज हिंडलगाने साला इलेव्हनचा पराभव करून पुढील फेरीत प्रवेश केला. प्रशांत गावडे, लोकेश भालेकर, गुरु होनंगी, संदीप पवार यांना सामनावीर पुरस्कार देण्यात आला.

पहिल्या सामन्यात झारा इलेव्हनने प्रथम फलंदाजी करताना 6.4 षटकात सर्व गडी बाद 35 धावा केल्या. मुन्नावरने 3 चौकारांसह 18 धावा केल्या. माउली स्पोर्टसतर्फे प्रशांत जी व प्रमोद यांनी प्रत्येकी 3 तर रोहितने 2 गडी बाद केले. त्यानंतर माऊली स्पोर्ट्स देसूरने 4.4 षटकात 4 गडी बाद 36 धावा करून सामना 6 गड्यांनी जिंकला. प्रशांतने 2 षटकार, 2 चौकारांसह नाबाद 27 धावा केल्या.

दुसऱ्या सामन्यात निल बॉईज हिंडलगाने प्रथम फलंदाजी करताना 8 षटकात 8 गडी बाद 74 धावा केल्या. आदित्यने 1 षटकारासह नाबाद 17, प्रतिकने 2 षटकारासह 15 तर अजयने 3 चौकारासह 13 धावा केल्या. जेएसपी बॉईजतर्फे योगेशने 3 धावात 3, गुलामने 2 गडी बाद केले. त्यानंतर निल बॉईज हिंडलगाने 6.2 षटकात 5 गडी बाद 77 धावा करून सामना 5 गड्यांनी जिंकला. संदीप पवारने 4 षटकारासह 24, नयनने 2 चौकार,   षटकारसह नाबाद 19 तर चैतन्य 2 षटकारासह 16 धावा केल्या. जेएसपी बॉईजतर्फे आदित्यने 3 गडी बाद केले.

तिसऱ्या सामन्यात एसजी बॉईजने प्रथम फलंदाजी करताना 7.3 षटकात सर्व गडी बाद 58 धावा केल्या. सुदर्शनने 10 तर प्रकाशने 11 धावा केल्या. साईराज ब तर्फे गुरु होनंगीने 13 धावात 4, रोशन व विजय यांनी प्रत्येकी 2 गडी बाद केले. प्रत्युत्तरादाखल खेळताना साईराज ब ने 7.4 षटकात 5 गडी बाद 61 धावा करून सामना 5 गड्यांनी जिंकला. अवधूत 2 षटकारासह नाबाद 27 तर कपिलने 11 धावा केल्या. एसजी बॉईजतर्फे विशालने 2 गडी बाद केले. चौथ्या सामन्यात साला इलेव्हन संघाने प्रथम फलंदाजी करताना 8 षटकात 4 गडी बाद 38 धावा केल्या. शाहबाजने 2 षटकारासह नाबाद 22 धावा केल्या. त्यानंतर निल बॉईजने 4 षटकात 3 गडी बाद 39 धावा करून सामना 7 गड्यांनी जिंकला. संदीप पवारने 3 षटकारासह 20, तनिष्क नाईकने नाबाद 10 धावा केल्या.

मंगळवारचे सामने

• डेपो मास्टर विरुद्ध एचएमडी स्पोर्ट्स सकाळी 9 वाजता.
• केआर शेट्टी मंगाई स्पोर्टस वि. माऊली स्पोर्ट्स देसाई सकाळी 11 वा.
• शक्ती फॅक्ट्रीज वि. एवायसी इलेव्हन दुपारी 1 वाजता.
• साईराज ब विरुद्ध दुसऱ्या सामन्यातील विजयी संघ-दुपारी 3 वाजता.